Elordada asa iri kólemdegi kontrabanda boıynsha qylmystyq is toqtatyldy
NUR-SULTAN. QazAqparat – Elordada asa iri kólemdegi ekonomıkalyq kontrabanda boıynsha adamdar tobyna qatysty qozǵalǵan qylmystyq is bir jyldan keıin toqtatyldy, dep habarlaıdy QazAqparat.
Nur-Sultan qalalyq sotynan málim etkendeı, úsh azamat 6 keliden astam altyn buıymdaryn Qazaqstanǵa zańsyz ákeldi dep aıyptalǵan. Biraq memlekettik prokýror óz aıyptarynan bas tartqandyqtan, qylmystyq is toqtatyldy.
«S.A.Kóshkinbaev, S.A.Qonaqbaev jáne B.A.Sháripov 2018 jyldyń 28 qazanynda keden organdarynda dekalaratsııadan ótkizbeı, Túrkııadan Qazaqstanǵa 6003,51 gramm salmaǵyndaǵy altyn buıymdardy kirgizgen. Tergeý organy atalǵan tulǵalardy aldyn ala sóz baılasý arqyly asa iri kólemdegi ekonomıkalyq kontrabandany jasady dep aıyptady. Іsti sotta qaraý barysynda memlekettik aıyptaýshy qylmys quramynyń bolmaýyna baılanysty óz aıyptaýlarynan tolyǵymen bas tartty. Onyń málimetinshe, antıkorrýptsııalyq organ qyzmetkerleri jedel-izdestirý sharasyn iske asyrý barysynda «Jedel-izdestirý qyzmeti týraly» zańnyń 15-babyn buzǵan. Prokýrordyń aıyptaýdan tolyǵymen bas tartýyna oraı, Qylmystyq is júrgizý kodeksiniń 337-baby 7-bóligine sáıkes, sot qylmystyq isti toqtatty», - dedi qalalyq sottan.
Sot altyn buıymdardy QR kedendik zańnamasyna sáıkes rásimdeý jáne deklaratsııalaý úshin keden organdaryna jiberdi.
Nur-Sultan qalasy №2 Esil aýdandyq sotynyń úkimi zańdy kúshine engen joq.
