Elordada asa iri kólemde esirtki tabyldy

NUR-SULTAN. QazAqparat – Elordalyq polıtseıler arnaıy operatsııa barysynda asa iri kólemde esirtki zattaryn saqtaǵan kúdiktini ustady. Bul týraly QazAqparat Nur-Sultan qalasynyń Polıtsııa departamentine silteme jasap habarlaıdy.

«36 jastaǵy er adam Taraz kóshesinde kóliginiń janynda ustaldy. Onyń kóligin tintý kezinde jedel ýákilder oryndyq astynan untaq tárizdi zat salynǵan polıetılen paket tapqan. Saraptama qorytyndysy boıynsha, salmaǵy 200 gramnan asatyn gashısh esirtki zaty tárkilendi. Kúdiktiniń buryn osyǵan uqsas qylmystar úshin birneshe ret sottalǵany belgili boldy», - delingen habarlamada.

Atalǵan fakti boıynsha QR Qylmystyq kodeksiniń 296-babynyń 4-bóligimen sotqa deıingi tergeý júrip jatyr. Kúdikti Nur-Sultan qalasynyń tergeý ızolıatoryna qamalǵan.

Elordalyq Polıtsııa departamentiniń málimetine qaraǵanda, jyl basynan beri esirtkige qatysty 400-den astam qylmysy tirkelgen. Onyń ishinde 62 is saýdamen baılanysty. Zańsyz aınalymnan 100 keli esirtki alyndy.