Elordada arnaıy áleýmettik kómek 254 adamǵa kórsetildi
ASTANA. 9 qańtar. QazAqparat - Astana qalasynyń Jumyspen qamtý jáne áleýmettik baǵdarlamalar basqarmasy arnaıy áleýmettik kómek berý jóninde elordanyń úkimettik emes uıymdarymen jyl saıynǵy kelisim-sharttar jasaý jumystaryn júrgizýde, dep habarlady astana.kz saıty.
Ótken jyly memlekettik áleýmettik tapsyrysty 4 úkimettik emes uıym oryndap, múgedek balalar men júıke aýrýlaryna ushyraǵan múgedekterge qyzmetter kórsetti.
«Úıde qyzmet kórsetý jaǵdaıynda áleýmettik qyzmetkerler muqtaj adamdardyń páterlerine kelip, qol ushyn beredi. Al, jartylaı statsıonar jaǵdaıynda - ata-analary múgedek balalardy jumys kúni ishinde ortalyqqa alyp kelýine bolady», - delingen basqarma habarlamasynda.
«Ótken jyly úıde qyzmet kórsetý jaǵdaıynda arnaıy kómek 116 adamǵa, jartylaı statsıonar jaǵdaıyndaǵy kómek - 138 adamǵa kórsetildi», - dep naqtylaıdy vedomstvodan. Bıylǵy jyly atalǵan baǵyttaǵy jumystar odan ári jalǵasady.
