Elordada arnaıy tehnıkany basqarýdyń biryńǵaı tsıfrlyq ekojúıesi engizildi
ASTANA. KAZINFORM — «Astana Tazalyq» mekemesi «KazTraffic-2025» kórmesinde qalalyq sanıtarlyq qyzmettiń tsıfrlyq jańalyqtaryn tanystyryp, elordanyń qysqy maýsymǵa daıyndyq barysyn jarııa etti.
Astanada QR Kólik mınıstrliginiń qoldaýymen 19-21 qarasha aralyǵynda XXI halyqaralyq «KazTraffic-2025» kórmesi ótip jatyr. Bul shara — jol qurylysy, ınfraqurylym jáne zamanaýı tehnologııalardy engizý salasyndaǵy eń iri ári bedeldi salalyq alańdardyń biri. Bıyl kórmege Qazaqstan, Qytaı, Túrkııa, Italııa, Frantsııa, Kanada, Ózbekstan jáne ózge de elderden 300-den astam kompanııa qatysyp jatqany anyqtaldy.
Kórme aıasynda «Astana Tazalyq» JShS qalalyq sanıtarlyq qyzmettiń tsıfrlyq transformatsııasyn jan-jaqty tanystyrdy.
— Kásiporyn usynǵan monıtorıng júıesi GPS-baqylaýdy, janarmaı shyǵynyn, tsıfrlyq jol paraqtaryn jáne marshrýttardy taldaý quraldaryn bir ekojúıege biriktiredi. Bul sheshim qazirgi ýaqytta qalanyń 440 arnaıy tehnıkasyna engizilip, eseptilikti avtomattandyrý, JJM shyǵysynyń ashyqtyǵy jáne tıimdi marshrýttyq josparlaý boıynsha joǵary nátıjeler kórsetip otyr, — delingen habarlamada.
Elektrondyq jol paraǵymen birge tehnıkanyń tehnıkalyq jaǵdaıyn onlaın baqylaý, qyzmetkerlerdiń kúndelikti medıtsınalyq tekseristen ótýin qadaǵalaý, qujat aınalymyn ońtaılandyrý múmkindigi týdy. Qaýipsizdik deńgeıin arttyrý úshin «Med365» jáne «Adal Chek» onlaın-medtekserý júıeleri qoldanylyp keledi, bul jelilik jumystardaǵy táýekelderdi aıtarlyqtaı tómendetedi.
Kórmede alǵash ret balalar men jasóspirimderge arnalǵan ekologııalyq Tazalike oqytý oıyny da kórsetildi. Oıyn qalanyń sanıtarlyq júıesiniń jumysyn túsindirýge, qoqysty durys suryptaýdy úıretýge, ekologııalyq mádenıetti qalyptastyrýǵa jáne jastardy ekologııalyq bastamalarǵa tartýǵa baǵyttalǵan zamanaýı ınteraktıv qural retinde usynyldy.
«KazTraffic-2025» kórmesine qatysý — «Astana Tazalyq» kásipornynyń qalanyń sanıtarlyq-ekologııalyq standarttaryn jańa deńgeıge kóterý, ınnovatsııalyq tehnologııalardy engizý jáne turǵyndardyń ekologııalyq mádenıetin nyǵaıtý jolyndaǵy turaqty ustanymyn aıqyn kórsetedi. Bul baǵyttaǵy júıeli jumys Astananyń qaýipsiz, jaıly jáne zamanaýı megapolıs retinde damýyna úles qosady.
Budan buryn 300-den asa kompanııa Astanada jol salasynyń ınnovatsııalaryn tanystyratynyn jazǵan edik.