Elordada arnaýly áleýmettik qyzmet kórsetý salasynda 11 zań buzýshylyq anyqtaldy
ASTANA. KAZINFORM — Jyl basynan beri Astanada arnaýly áleýmettik qyzmet kórsetý salasynda 11 zań buzýshylyq anyqtaldy. Bul týraly Astana qalasynyń kommýnıkatsııalar qyzmetinde ótken brıfıngte Halyqty áleýmettik qorǵaý salasyndaǵy retteý jáne baqylaý komıtetiniń Astana qalasy boıynsha departamentiniń basshysy Asqar Aımaǵambetov málim etti.
Onyń aıtýynsha, bıyl departament 36 baqylaý is-sharasyn júrgizgen. Onyń ishinde 24 tekserý Quqyqtyq statıstıka jáne arnaıy esepke alý organdarynda tirkelse, 12-si prokýratýra organdarynyń tapsyrmasy boıynsha ótkizilgen.
Tekserý nátıjesinde barlyǵy 78 zań buzýshylyq tirkelgen.
— Onyń 64-i múgedektigi bar adamdar úshin áleýmettik jáne kólik ınfraqurylymy nysandarynyń qoljetimdiligin qamtamasyz etý talaptarynyń saqtalmaýyna qatysty. Úsh zań buzýshylyq áleýmettik qyzmetter portaly boıynsha anyqtaldy. Al 11 zań buzýshylyq arnaýly áleýmettik qyzmet kórsetý salasynda tirkeldi, — dedi Asqar Aımaǵambetov.
Departament basshysynyń málimetinshe, zań buzýshylyqtardy joıý jóninde 14 nusqama berilgen.
— Bir laýazymdy tulǵa ákimshilik jaýapkershilikke tartyldy. Sonymen qatar jalpy somasy 5 mln 119 myń teńgege 16 ákimshilik aıyppul salyndy, — dedi ol.
Asqar Aımaǵambetov bıyl 28 mamyrda arnaýly áleýmettik qyzmet kórsetý jáne múgedektigi bar adamdardyń quqyqtaryn qorǵaý salasyndaǵy táýekelderdi baǵalaý ólshemderi men tekserý paraqtaryna ózgerister engizilgenin atap ótti.
— Buǵan deıin tekserý paraqtarynda arnaýly áleýmettik qyzmet kórsetýge lıtsenzııanyń bolýy týraly talap bolmaǵan. Endi engizilgen ózgerister lıtsenzııasyz qyzmet kórsetýdiń aldyn alýǵa, uıymdardyń jumysyn biliktilik talaptaryna sáıkestendirýge jáne memlekettik baqylaýdy kúsheıtýge múmkindik beredi. Sondaı-aq lıtsenzııalaý talaptary saqtalmaǵan jaǵdaıda ákimshilik shara qoldanýǵa quqyqtyq negiz qalyptasty, — dedi departament basshysy.
Aıta keteıik, buǵan deıin Astanada arnaýly áleýmettik qyzmet kórsetetin 18 uıym lıtsenzııa alǵanyn jazǵan edik.
