Elordada Armenııa kólikteriniń nómirin urlap, aqsha talap etkender ustaldy
NUR-SULTAN. QazAqparat – Armenııa men Qyrǵyzstannan ákelingen kólikterdiń nómirin urlap, ıelerinen aqsha talap etken elordanyń eki turǵyny ustaldy. Bul týraly QazAqparat qalalyq Polıtsııa departamentiniń baspasóz qyzmetine silteme jasap habarlaıdy.
«Nur-Sultan qalalyq Polıtsııa departamentiniń «Saryarqa» aýdandyq basqarmasynyń qyzmetkerleri 24 jastaǵy eki azamatty ustady. Onyń biri buryn alaıaqtyǵy úshin sotty bolǵan. Olar avtokólikterdiń sheteldik memlekettik nómirlerin urlap ketip (aldyn ala málimet boıynsha, Qyrǵyz Respýblıkasy men Armenııa elderiniń avtokólikterinen) kólikke hat qystyryp, nómir úshin qansha aqsha tóleýi tıis ekenin jazyp otyrǵan. Ortasha eseppen urylar ár nómir úshin 50 myń teńge alǵan», - dedi Polıtsııa departamentinen.
Qazirgi ýaqytta ustalǵan eki jas jigittiń osyǵan uqsas bes qylmysqa qatysy bary anyqtalyp otyr. QR Qylmystyq kodeksiniń 194-baby boıynsha sotqa deıingi tergeý amaldary júrgizilýde.
