Elordada ardagerler uıymdarynyń úılestirý keńesin qurý jónindegi birinshi sezi ashyldy
ASTANA. 18 aqpan. QazAqparat - Astanada Qazaqstan Respýblıkasy Ardagerler uıymdarynyń úılestirý keńesin qurý jónindegi birinshi sezi ótýde.
Atalmysh sharaǵa Parlament depýtattary soǵys ardagerleri men respýblıka aımaqtaryndaǵy soǵys ardagerleri uıymdarynyń ókilderi qatysýda. Jıynǵa qatysýshylar búgin basty úsh máseleni talqylamaq.
Ol Qazaqstan Respýblıkasy Ardagerler uıymdarynyń úılestirý keńesin qurý. Sonymen qatar jıynǵa qatysýshylar osy úılestirý keńesiniń tóraǵasyn saılap, onyń erejesi men qurylymyn bekitý úshin jumys tobyn qurýdy kózdep otyr. Sondaı-aq olar ardagerlerge qatysty qazirgi tańdaǵy eń ózekti degen máselelerdi de talqyǵa salmaq.
Jıyn barysynda kún tártibindegi máselege qatysty sóz qozǵaǵan «Qazaqstan Qarýly Kúshteriniń ardagerleri» respýblıkalyq qoǵamdyq birlestigi tóraǵasynyń orynbasary, general-maıor Murat Naǵymanov Ardagerler uıymdarynyń úılestirý keńesin qurý memleket pen qoǵam aldynda turǵan ózekti máselelerdi birlesip talqylaýǵa, óskeleń urpaqqa patrıottyq tárbıe berý máselesin retteýge múmkindik beretin ıgilik ekendigin atap ótti. «Sonymen qatar osy keńes arqyly biz soǵys ardagerleri men olardyń týǵan-týystaryna qol ushyn sozý baǵytyndaǵy máselelerdi de sheshýge múmkindik alamyz»,-dedi qoǵamdyq birlestik tóraǵasynyń orynbasary.
Ardagerler jıyn barysynda aýǵan soǵysy ardagerleriniń máselesine qatysty zań jobasy jóninde de ózara pikir almaspaq. «Bul qujattyń basty maqsaty - aýǵan soǵysy ardagerleriniń mártebesin kóterý. Búgin biz osy zań jobasyn jan-jaqty talqylap, bir aıdyń kóleminde tıisti qujattardy rettep, Parlamenttiń qaraýyna berýdi kózdep otyrmyz. Qazirgi tańda aýǵan soǵysynyń ardagerleri tek Uly Otan soǵysynyń ardagerlerine teńestirilgen azamattardyń qatarynda. Al shyn máninde soǵystyń aty soǵys. Uly Otan soǵysynyń ardagerleri kúnnen-kúnge azaıyp barady. Osy rette jastardyń boıynda otansúıgishtik pen patrıottyq sezimdi qalyptastyrý úshin aýǵan soǵysynyń ardagarlerine de arqa súıeıtin kez jetti degen oıdamyz. Óıtkeni olar keshegi Uly Otan soǵysy ardagerleriniń erlik isterinen úlgi alyp, soǵys degen tajaldyń adamzatqa qanshalyqty qaıǵy-qasiret ákeletinin kózimen kórip, janymen sezingen azamattar. Olar shyn beıbit ómirdiń ne ekenin bilip, Otan, týǵan jer degen qasıetti uǵymdardyń qadirine jete bilgen azamattar»,-deıdi Almaty oblysy aýǵan soǵysy ardagerleriniń uıymynyń tóraǵasy Qaırat Jańabaev.
Sondaı-aq onyń sózinshe jańa qujatta soǵys ardagerlerine beriletin jeńildikter men ardagerlerge jáne olardyń týǵan-týystaryna kórsetiletin kómek sııaqty ózge de keń aýqymdy máseleler qamtylmaq.
