Elordada ardagerler arasynda shańǵy jarysy ótti
ASTANA. 10 aqpan. QazAqparat - Keshe Astana qalasynda Qajymuqan Muńaıtpasov atyndaǵy ortalyq stadıonda ardagerler arasynda shańǵy krosy ótti.
Bul týraly elordanyń resmı saıtynan habarlady.
Іs-sharaǵa aǵa býyn ókilderinen - 100-ge tarta adam qatysty. Olardyń arasynda jasy 70-ten asqan ardagerler de bar. Sharaǵa qatysýshylar 400 metrlik stadıondy 4 ret aınalyp shyǵýy tıis boldy.
«Sporttyq is-sharany ótkizýdegi maqsat adamdy rýhanı jaǵynan jetildirip, shymyrlyqqa tárbıeleý, ortada salaýatty ómir saltyn qalyptastyrý. Ekinshiden, ardagerlerdi bir araǵa jınaý, kóńilderin kóterý. Jalpy, ardagerler belsendi bolýy kerek. Jastar bizdiń sózimizben qatar, isimizden de ónege alýy tıis», - deıdi Astana qalasy Ardagerler keńesiniń tóraǵasy Beken Álimjanov.
1600 metrlik qashyqtyqty áıelder arasynda «Jelaıaq» áýesqoı júgirýshiler men salaýatty ómir saltyn qalyptastyrý klýbynyń tóraıymy Raısa Mıheeva alǵashqy bolyp keldi.
«Meniń ómirlik ustanymym, eń áýeli ishki jan-dúnıeńdi baǵyndyra bilý, al jeńis men úshin mańyzdy emes. Meni ataq-dańq múlde qyzyqtyrmaıdy. Óıtkeni, buǵan deıin birneshe ret saıystarda jeńiske jetip, júlde ataýlynyń túr-túrin alyp keldim. Men júgirýdi 45 jasymda bastadym. Sodan beri 27 jyl ótti, 72 jasqa kelsem de júgirýdi tastaǵan emespin. Kún saıyn 6 shaqyrym júgiremin. Tipti jaıaý júrý úshin kóligimdi de satyp jiberdim», - deıdi Raısa Mıheeva.
Іs-sharany uıymdastyrýshylar kross aıaqtalǵan soń ardagerlerge arnaıy dastarqan jaıyp, qurmet kórsetti.
