Elordada árbir besinshi jol apaty jaıaý júrginshiniń kinásinen bolady
ASTANA. QazAqparat – Bıyl Astanada jol erejesin saqtamaýdyń 94 044 faktisi anyqtalyp, azamattarǵa 729 mln teńgeden astam somaǵa aıyppul salynǵan, dep habarlaıdy QazAqparat tilshisi.
«Jol-kólik oqıǵalarynyń basty sebebi – júrgizýshilerdiń tártipsizdigi. Sonymen qatar árbir besinshi oqıǵa nemese quqyq buzýshylyqtardyń 30 paıyzy jaıaý júrginshilerdiń kinásinen bolyp otyr. Bıyl І toqsanda 94 044 quqyq buzýshylyqtyń joly kesilip, 729 mln 438 myń 497 teńgege aıyppul salyndy. Onyń ishinde 479 mln 654 myń 011 teńgege óteldi. Atap aıtqanda, 4 284 jaıaý júrginshige, 456 mas júrgizýshige, 452 basqarý quqyǵynan aıyrylǵan azamatqa aıyppul salyndy», - dep málim etti Astana qalalyq Ákimshilik polıtsııa basqarmasynyń bólim basshysy Baýyrjan Toǵjumanov BAQ ókilderiniń qatysýymen ótken brıfıngide.
Sonymen birge ol jyl basynan beri elorda aýmaǵynda 110 jol-kólik oqıǵasy tirkelip, saldarynan 6 adam qaza tapqanyn aıtty. Buǵan qosa, 123 adam ártúrli dene jaraqatyn alǵan.
Eske sala keteıik, taıaýda Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova jyl saıyn 13 myńnan astam jol-kólik oqıǵasy tirkelip, 2 myńnan astam adam qaza tabatynyn málimdep edi.
