Elordada ár adam óziniń áleýmettik jobasyn usyna alady
ASTANA. QazAqparat - Elordada qyrkúıek aıynda ótetin «Qazaqstanda iske asyrylatyn úzdik áleýmettik jobalar» respýblıkalyq kórmesine kez kelgen adam óziniń jobasyn usyna alady. Bul týraly astana.kz saıtyna qalalyq Jumyspen qamtý jáne áleýmettik baǵdarlamalar ortalyǵynan habarlady.
Halyqty áleýmettik qorǵaý júıesi aıasynda qyzmet etetin kez-kelgen qoǵamdyq birlestikter men uıymdar, vedomstvolar, mekemeler jáne jeke tulǵalar qarjylandyrý kózine qaramastan atalǵan sharaǵa qatysa alady. Uıymdastyrýshylar bir jyldan astam ýaqyttan beri iske asyrylyp jatqan, sondaı-aq, áleýmettik mańyzdy jáne is júzinde oń nátıje beretin jobalarǵa basa nazar aýdarady. Budan basqa, joba qıyn ómirlik jaǵdaıǵa tap bolǵan jáne áleýmettik kómek pen qoldaýǵa muqtaj halyq toptaryn qamtýy tıis. Komıssııa músheleriniń qaraýyna usynylǵan úzdik joba kórmege shyǵarylady. Kórmege qatysýshylar 12 qyrkúıekke deıin jobanyń prezentatsııasy tirkelgen ótinishterin joldaýlar tıis. Bul shara elordada ekinshi ret ótkiziledi. Uıymdastyrýshylar Astana qalasynyń turǵyndaryn elimizde ázirlenip jatqan jobalar jáne olardyń múmkindigi shekteýli jandar úshin mańyzdylyǵy jóninde habardar etý úshin sharany jyl saıyn ótkizýdi josparlap otyr. Vedomstvo qyzmetkerleri byltyr kórme pılottyq rejımde ótkizilgenimen jaqsy ıdeıalar men jobalar kóp bolǵanyn atap ótti. Shara barysynda kelýshiler nazaryna «Jumystarǵa múgedek jandardy tarta otyryp, aǵash, saz, kıiz, teri, tas, bıserden qolmen ımıdjdik kádesyı ónimderin jasaý» jobasy usynyldy. Jobanyń avtorlary - Múgedekter qoǵamdyq birlestiginiń jáne Dına Ergıldınovanyń jetekshiligimen «DOS» táýelsiz ómir ortalyǵynyń músheleri. Múgedekterdi jumyspen qamtý sııaqty mańyzdy mindetti atqaratyndyqtan naq osy joba úzdik dep tanyldy.
