Elordada Apple Store qaǵıdaty boıynsha jumys isteıtin HQKO ashyldy
ASTANA. KAZINFORM — Astanada Apple Store qaǵıdatyna negizdelgen jańa býyndaǵy tsıfrlyq keńse — Smart Point ashyldy.
Jańa formattaǵy keńsede memlekettik qyzmetterdi óz betinshe alý qaǵıdaty basymdyqqa ıe. Al «Azamattarǵa arnalǵan úkimet» memlekettik korporatsııasynyń qyzmetkerleri azamattarǵa tsıfrlyq servısterdi paıdalaný boıynsha keńes berip, qajetti qyzmetti rásimdeýge baǵyt-baǵdar kórsetedi.
Búgin jańa keńseniń jumysymen Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev tanysty. «Azamattarǵa arnalǵan úkimet» memlekettik korporatsııasy Basqarma Tóraǵasy Arman Kenjeǵalıev mınıstrge Smart Point tujyrymdamasy men keńseniń fýnktsıonaldyq aımaqtaryn tanystyrdy. Sondaı-aq memlekettik qyzmetterdi óz betinshe alýǵa arnalǵan tsıfrlyq sheshimder kórsetildi.
— Memlekettik qyzmetterdi tsıfrlyq sheshimder men jasandy ıntellekt tehnologııalary negizinde kórsetýdiń jańa modelin qalyptastyrý mańyzdy. Smart Point sııaqty formattar halyqqa qyzmet kórsetý ortalyqtarynyń jumysyn jańa deńgeıge kóteredi. Búgingi tańda osy úlgini keńinen engizý — basty mindetterdiń biri. Sebebi bul azamattar men bıznes úshin memlekettik qyzmetterdiń sapasy men qoljetimdiligin arttyrýǵa tikeleı yqpal etedi, — dep atap ótti Jaslan Mádıev.
Smart Point keńsesinde qyzmet alýshylar memlekettik qyzmetterdi onlaın rásimdeýge arnalǵan kompıýterlerdi paıdalana alady. Sonymen qatar dıalog formatynda jumys isteıtin eGovGPT kópagentti jasandy ıntellekt platformasy qajetti memlekettik qyzmetti anyqtap, ony onlaın rásimdeýge kómektesedi. Sondaı-aq qujattandyrý termınaly arqyly jeke kýálik nemese pasport alýǵa ótinish berýge múmkindik bar. Budan bólek, jańa tsıfrlyq keńsede tsıfrlyq servısterdi paıdalanýdy úıretýge arnalǵan oqý synyby men jaıly kútý aımaǵy qarastyrylǵan. Smart Point-tiń basty erekshelikteriniń biri — táýlik boıy jumys isteıtin qujattardy berý aımaǵy.
— Smart Point — halyqqa qyzmet kórsetýdiń zamanaýı formattaryn damytýǵa baǵyttalǵan júıeli jumysymyzdyń bir bóligi. Bizdiń maqsatymyz — tsıfrlyq tehnologııalardy memlekettik qyzmetterdi alýdyń tabıǵı ári qolaıly tetigine aınaldyrý. Sondyqtan biz azamattardyń jaılylyǵy, qoljetimdilik jáne olardyń qajettilikteri basty nazarda bolatyn osyndaı keńistikterdi damytýdy jalǵastyramyz, — dedi Memlekettik korporatsııanyń basqarma tóraǵasy Arman Kenjeǵalıev.
Aıta ketelik 6 shilde kúni HQO-lar qalaı jumys isteıtini týraly jazǵan edik.
