Elordada apatty jaǵdaıdaǵy kóppáterli úılerde turyp jatqan turǵyndar jańa páterlerge kóshiriledi - I. Tasmaǵambetov
ASTANA. 3 maýsym. QazAqparat /Rýslan Ǵabbasov/ - Elordada óte qaýipti apatty jaǵdaıdaǵy kóppáterli úılerde turyp jatqan turǵyndar jańa páterlerge kóshiriledi. Bul týraly búgin Elbasynyń qatysýymen ótip jatqan Astananyń keleshektegi damýyna arnalǵan keńeste elorda ákimi Imanǵalı Tasmaǵambetov málim etti.
Ákimniń sózine qaraǵanda, Astanada apatty jaǵdaıda turǵandardyń sanatyna jatatyn 231 kóppáterli úı bar. Onyń ishinde 86-sy turýǵa aıtarlyqtaı qaýipti turǵyn úı bolyp anyqtaldy. Osy oraıda ol, bul máseleni kezeń-kezeńmen sheship, qalanyń kommýnaldyq menshiginen 490 páterdi qaladaǵy Kenesary kóshesi boıyndaǵy Sembınov kóshesi qıylysynan, Brýsılovskıı kóshesi qıylysyna deıingi úılerde turyp jatqan turǵyndarǵa usyný kerektigin aıtyp ótti.
Sonymen qatar qala basshysy turǵyn úıdiń aýdany 1:1 esebimen almastyrylatynyn jetkizdi. Alǵashqy kezeńde 21 úı súrilip tastalatyn bolady.
