Elordada apatty jaǵdaıda turǵan úı súrilip, ornyna jańa turǵyn úı salyndy
«Elordada qurylysy uzaqqa sozylǵan, problemaly nysandardyń birin aıaqtadyq. «Terrıtorııa komforta-1» turǵyn úı kesheniniń tarıhy 2004 jyly bastalǵan. Úıdi tehnıkalyq tekserý barysynda ǵımarattyń apatty jaǵdaıda ekeni anyqtaldy. Burynǵy qurylys salýshy tehnıkalyq standarttarǵa sáıkes kelmeıtin beton markasyn qoldanǵan, al plıtalar arasynda túıisken jeri saqtalmaǵan. Qurylysshylar aıtqandaı, bul úı paıdalanýǵa berilse, kóp uzamaı qırap, turǵyndar astynda qalatyn edi.
Apatty jaǵdaıdaǵy kóppáterli turǵyn úı kesheniniń barlyq blogyn buzý boıynsha aýqymdy jumys júrgizildi. Onyń ornyna jańa turǵyn úı kesheni salyndy, eń bastysy – qaýipsiz. Munda bas-aıaǵy 500-den astam úlesker bar. Úıdi aıaqtaý eki kezeńnen turady. Alǵashqy 135 úlesker kópten kútken páterin aldy, olar bul kúndi 17 jyl boıy kútti. Ekinshi kezeń boıynsha jumys júrip jatyr.
2019 jyldyń jazynda qala boıynsha barlyǵy 16 myń úlesker otbasy bolǵan, 2,5 jyl ishinde 13 myń úleskerdiń problemasy sheshildi. Máselen bıyl 57 kóppáterli turǵyn úı kesheniniń qurylysy aıaqtaldy. Bul 7 myń úleskerdiń problemasyn sheshýge múmkindik berdi.
Jańa 2022 jyly taǵy 40 kóppáterli turǵyn úıdi, 2023 jyly 20 kóppáterli turǵyn úı-donor salýdy josparlap otyrmyz. Osylaısha, 2023 jyly elordada qurylysy uzaqqa sozylǵan úılerdiń problemasyn tolyq sheshýdi josparlap otyrmyz. Qurylys jumystarynyń aıaqtalýy Memleket basshysynyń tikeleı baqylaýynda», – dep jazdy elorda ákimi.
