Elordada apatty úılerden 1 863 otbasy kóshiriledi
ASTANA. QazAqparat - Apatty úılerdi kúreý boıynsha qanatqaqty joba «Nurly jer» memlekettik baǵdarlamasyna sáıkes júzege asyrylyp jatyr, dep habarlaıdy QazAqparat elorda ákimdiginiń medıa ortalyǵyna silteme jasap.
Bıyl elordada 111 apatty jaǵdaıdaǵy úılerde turatyn 1 863 otbasyny jańa baspanaǵa kóshirý josparlanǵan, dep málim etti qalalyq Turǵyn úı basqarmasynyń basshysy Rýslan Ahmetov.
Qazirgi tańda 98 tótenshe jaǵdaıdaǵy úıde turyp jatqan 1 425 otbasy kóshirilip jatyr.
«Elorada apatty úılerdi kúreý boıynsha qanatqaqty joba «Nurly jer» memlekettik baǵdarlamasyna sáıkes júzege asyrylyp jatyr. Atalǵan joba zor áleýmettik mańyzǵa ıe jáne turǵyndardyń baspanasyn jaqsartýǵa baǵyttalǵan», - dedi R.Ahmetov.
Baǵdarlamanyń birinshi kezeńinde keshendi tekserý nátıjesinde qaladaǵy 228 nysan apatty dep tanyldy. Osy jyldyń basynda 117 apatty úı buzyldy. Qazirgi kúni 98 úıde turatyn shamamen 1,5 myń otbasyny kóshirý jumysy júrgizilip jatyr. Al qalǵan tozyǵy jetken 13 úıdiń turǵyndary nysandardyń tapsyrylýyna qaraı jyl sońyna deıin kóshiriledi.
Qanatqaqty jobanyń shartyna sáıkes Astana ákimdigi apatty úılerdi kúrep, onyń ornyna baspananyń aýdanyna sáıkes jańa turǵynjaı beredi. Kóshirý kezinde páterdiń aýdanymen birdeı baspana usynylady.
«Bul jaǵdaıda apatty úılerdiń turǵyndary jańa baspanaǵa kóshirý kezinde otbasy músheleriniń sany men tótenshe jaǵdaıdaǵy úıdegi bólme sany esepke alynbaıtynyn eskerýi kerek», - dedi R.Ahmetov.
Injenerlik jelileri men qurylys konstrýktorlary tozǵan, 1940-1980 jyldar aralyǵynda salynǵan úıler kúreledi.
Elordanyń bas jospary men Astana ákimi Áset Isekeshevtiń tapsyrmasyna sáıkes kúrelgen úılerdiń ornyna saıabaq, gúlzar men býlvarlar qurylysyn júrgizý kózdelip otyr.
2013-2016 jyldar aralyǵynda 117 apatty úı kúrelip, 1 570 otbasy jańa ári jaıly baspanaǵa kóshirildi.
