Elordada apatty úıde turatyn 300 otbasy bıyl jańa baspanaǵa kóshedi

NUR-SULTAN. QazAqparat - Sońǵy 3 jylda apatty úılerden 700-ge jýyq otbasy kóshirildi. Baǵdarlama bastalǵannan beri shamamen 4 myń 200 otbasy qonys aýdarǵan, dep habarlaıdy QazAqparat.

Bul jaıynda qala basshysy Altaı Kólginov málim etti.

«Bıyl apatty jaǵdaıdaǵy eski úılerdiń arasynda qaýipti kúıdegi 18 úıdiń turǵyndaryn kóshiremiz. Onda 300-den astam otbasy turady. Mundaı kóppáterli jáne jeke úılerdiń problemasy negizinen elektr symymen, kárizben, sýmen, shatyrmen, irgetasymen baılanysty. Tipti páter ishinde pesh te ornatylǵan, dárethanasy syrtta ornalasqan turǵyn úıler de bar. Birqatar apatty úılerdiń turǵyndarymen kezdestim. Máselen Saryarqa aýdanynda turatyn turǵyndarmen (Raýan tuıyq kóshesi, 15, 16, 17) kezdesýde kóshý máselesi talqylandy. Olardyń baspanasy apatty eski úıler tizimine engizilgen: qazirgi ýaqytta olarǵa arnap jańa turǵyn úı kesheni salynyp jatyr, ony jyl sońyna deıin aıaqtaýdy josparlap otyrmyz. Turǵyn úı kesheniniń qurylysy aıaqtala salysymen Raýan tuıyq kóshesi 15, 16, 17 mekenjaıynda turatyn turǵyndardy kóshiremiz»,- dep jazdy ákim Instagram paraqshasynda.

Onyń aıtýynsha, elordany damytý baǵdarlamasy boıynsha turǵyndardy qaýipti úılerden kóshirý jumysy júrip jatyr.

Sońǵy 3 jylda apatty úılerden 700-ge jýyq otbasy kóshirildi. Baǵdarlama bastalǵannan beri shamamen 4 myń 200 otbasy qonys aýdarǵan.

Sol sııaqty qalada 200-den astam apatty úı bar. Olar boıynsha tıisti jumys josparly túrde júrgiziledi.

«Sonymen qatar, Memleket basshysynyń tapsyrmasy boıynsha baspana jaǵdaıyn jaqsartý úshin turǵyn úı keshenin jóndeý, lıftilerdi aýystyrý, jeńildikti áleýmettik turǵyn úı qurylysy, uzaqqa sozylǵan qurylystardy aıaqtaý boıynsha jumys jalǵasyp jatyr» dep atap ótti Altaı Kólginov.

Foto: gov.kz