Elordada apatty kúıdegi sport kesheni jóndeldi
NUR-SULTAN. QazAqparat – Elorda qalasynyń ákimi Altaı Kólginov apatty jaǵdaıda turǵan «Tolqyn» sport kesheniniń jóndeýden ótip, qaıta ashylǵanyn málim etti, dep habarlaıdy QazAqparat qala ákimdigine silteme jasap.
«Halyq sanynyń ósýi men áleýmettik nysandarǵa muqtajdyqty eskere otyryp, jańa áleýmettik qurylys salý ǵana emes, sonymen birge qolda bar ǵımarattardy jóndep, jaı-kúıin baqylap otyrý kerek. Búgin birqatar jóndelgen sport nysanyn araladym.
Mysaly, «Tolqyn» sport kesheninde balalar sý sportymen aınalysady. Biraq ǵımarat apatty jaǵdaıda bolyp, sport kesheni tolyq jumys istemegen. Ǵımarat 20 jyl buryn salynǵan, osy ýaqyt ishinde kúrdeli jóndeý júrgizilmegen.
Negizgi problemalanyń biri shatyrynan – sý ketý. Bólmeleri sýyq, al qabyrǵalardyń sylaǵy qulap jatty. Qazir qıyndyqtarynyń bári sheshildi, onyń ishinde - bólmelerdegi aýa aınalymy da jaqsardy. Qurylys salýshyǵa ǵımarattyń qasbeti máselesin pysyqtaýdy tapsyrdym», - dedi Altaı Kólginov.
Onyń aıtýynsha, keshenge qosymsha sport jabdyqtary satyp alynǵan. «Memleket basshysynyń tapsyrmasy boıynsha sport nysandarynyń qoljetimdiligin arttyrý, buqaralyq sportty kópshilikke taratý jáne balalar men jasóspirimderdiń sportpen aınalysýyna qajet jaǵdaı jasaý úshin jumys isteımiz. Óıtkeni, densaýlyqty kútý jáne salaýatty ómir saltyna beıimdelý erte jastan bastalýy kerek.
Ótken jyly 150 aýla men 60 qoǵamdyq keńistik abattandy, onda sportpen aınalysýǵa arnalǵan arnaıy oryndar qarastyryldy. Bıyl osy jumysty ary qaraı da jalǵastyramyz», - dedi Altaı Kólginov.
