Elordada apatqa sebep bolǵan kólik órtendi
NUR-SULTAN. QazAqparat - Elordada baǵdarshamnyń qyzyl túsine ótken «Lada» markaly kólik apat saldarynan otqa orandy, dep habarlaıdy QazAqparat.
Nur-Sultan qalasy polıtsııa departamentiniń habarlaýynsha, oqıǵa búgin saǵat 06.52-de bolǵan.
«Lada» markaly avtokóliktiń 20 jastaǵy júrgizýshisi Y.Dúkenuly kóshesi jaǵynan Respýblıka dańǵylymen kele jatyp, Bógenbaı batyr dańǵylynyń qıylysynda baǵdarshamnyń qyzyl túsine ótip ketken. Saldaryna 60 jastaǵy júrgizýshi tizgindegen Hyundai Elantra markaly avtokóligke soǵylǵan.
«Soqqy saldarynan Hyundai Elantra avtokóligi qıylysta turǵan Iveco Crossway markaly marshrýttyq avtobýsyna soǵylǵan. Al «Lada» kóligi otqa orandy. Apat saldarynan «Lada» jáne Hyundai Elantra júrgizýshileri jeńil jaralanǵan. Medıtsına mamandary olardy alǵashqy kómek kórsetip, úılerine jiberdi. Oqıǵanyń mán-jaıyn anyqtalýda», - dep habarlady departament.
