Elordada ánshi Bıbigúl Tólegenovanyń 80 jyldyq mereıtoıyna arnalǵan kontsert ótti
sp;ASTANA. Jeltoqsannyń 19-y. QazAqparat /Marlan Jıembaı/ - Búgin Elordadaǵy Kongress-Holl saraıynda KSRO halyq ártisi, Sotsıalıstik Eńbek Eri, KSRO jáne Qazaqstan Memlekettik syılyqtarynyń laýreaty Bıbigúl Tólegenovanyń 80 jyldyq mereıtoıyna arnalǵan kontsert ótti,
dep habarlaıdy QazAqparat.
«Qazaqtyń bulbuly» atanǵan óner sańlaǵynyń keshinde ánshiniń ózimen qatar shákirtteri Talǵat Musabaev, Gúljanat Sapaqova, Jan Tapın, Elena Nızamýtdınova, Marjan Tórehanova, Tolqyn Zabırovanyń oryndaǵan ánderin elorda halqy yqylaspen tyńdap, zor qoshemet kórsetti.
Shyǵarmashylyq kesh baǵdarlamasyna álemdik klassıkalyq opera men halyq ánderinen 30-ǵa jýyq shyǵarmalary engen. Kontsert barysynda qazaqtyń kúmis kómeı, jez tańdaı ánshisi Bıbigúl Tólegenova Dj.Pýchchınıdiń «Djannı Skıkkı» operasynan Laýretta, Ǵ.Jubanovanyń «Eńlik-Kebek» operasynan Eńlik arııasyn sondaı-aq «Gaýhartas», «Aqqý edim kóldegi», «Baıanjan», «Qosh aman bol», «Shirkin-aı» syndy qazaq halyq ánderin naqyshyna keltire oryndady.
Bıbigúl Ahmetqyzy Tólegenova 1929 jyly jeltoqsannyń 16-da Semeı qalasynda dúnıege keldi. 1954 jyly Almaty memlekettik konservatorııasyn bitirdi. Onyń ánshilik talantyn tanyp, óner jolyna túsýine baǵyt siltegen, ári tuńǵysh dáris bergen orys jazýshysy G.Serebrıakova boldy. Ánshiniń alýan taqyrypty repertýarynda qazaqtyń halyq ánderi, Batys Eýropa kompozıtorlarynyń vokaldyq shyǵarmalary bar. Ol óziniń kontserttik-oryndaýshylyq ónerin sheberliktiń joǵary satysyna kóterip, klassıkalyq dárejege jetkizdi, opera ónerine de eleýli úles qosty. Birneshe fılmderde óz zamandastarynyń obrazyn jasap, óneri búkil dúnıejúzine tanyldy. Gastroldik saparmen Polsha, Chehoslavakııa, Úndistan, Aljır, Mysyr, Sırııa, Vetnam, AQSh sııaqty elderde bolyp, óner kórsetti.
