Elordada «Anama qarap boı túzeımin» atty ulttyq baıqaý ótti
ASTANA. KAZINFORM - Elordada ótken ulttyq baıqaý júldegeri Katarǵa joldama jeńip aldy.
Jobanyń basty maqsaty – urpaq tárbıesin ulaǵattaý. Talantty, ıbaly, ınabatty qyzdar men olarǵa ónegeli tárbıe berip otyrǵan analardy nasıhattaý.
Jýrnalıst Baǵdagúl Rahmetqyzynyń avtorlyq jobasy 2022 jyly - Balalar jylyna oraı otbasylyq qundylyqtardy dáripteý, anasy men qyzy arasyndaǵy ádemi ádepti kórsetý maqsatynda bastaý alǵan.
Bıyl baıqaýǵa 7 úmitker qatysty. Olar Astana qalasy, Aqmola, Qaraǵandy jáne Jambyl oblysynan keldi.
Baıqaý 4 kezeńnen turady. Olar: tanystyrý jáne óner kórsetý bólimi; salt-dástúrimizden kórinis; salt-dástúrge baılanysty suraq-jaýap, maqal-mátelderdiń jalǵasyn tabý, ulttyq taǵam ázirleý jáne qolóner týyndylaryn tanystyrý.
Al baıqaýǵa, belgili ánshi Maıra Іlııasova, qoǵam qaıratkeri Orazgúl Asanqazy, ulttyq óner dızaıneri Yrza Tursynzada, jýrnalıst Baǵdagúl Rahmetova t.b. qazylyq etti.
«Bul baǵdarlamanyń ultymyzǵa bereri mol. Qazaq degen halqymyzdyń, ulttyq qundylyǵyn ǵasyrlardan-ǵasyrlarǵa jetkizemiz deıtin bolsaq, áýeli analarǵa kóńil bólýimiz kerek. Sondyqtan osyndaı jobalardyń mańyzy zor dep bilemin», - deıdi belgili qoǵam qaıratkeri Orazgúl Asanǵazyqyzy.
Ádilqazylar sheshimimen bas júlde Jambyl oblysynan kelgen Shákızat Myńbosynovaǵa buıyrdy.
Bas júlde ıegerleri Katar memleketine 1 aptaǵa tegin demalys utyp aldy.
«Ulttyq salt-dástúrlerimizdi jańǵyrtatyn jobanyń janashyry retinde bas demeýshi bolýǵa sheshim qabyldadyq. Osymen 3-shi jyl qatarynan baıqaýǵa syı daıyndap kelemiz. Bıyl da bas júldege Katarǵa joldamany tiktik. Jeńimpaz anasy men qyzy qonaqúıi, tamaǵy, joly tegin joldamamen shetelde bir apta demalyp keletin bolady», - deıdi týrıstik agenttiktiń dırektory Dınara Asanova.
Sondaı-aq eki 1-shi oryndy Shynar Battalova men Maıra Jáıtinbekqyzy bólisti. Sonymen qatar, 2-shi oryn men 3-shi oryn qos-qos júldegerge buıyrdy.
Aıta keteıik, atalǵan joba respýblıkalyq «Arý Ana» úzdik áıelder jobalary konkýrsynda Astana qalasy boıynsha 2024 jyldyń úzdik jobasy dep tanyldy.
