Elordada «Analar amanaty» qolóner shyǵarmashylyǵy ortalyǵy ashyldy
NUR-SULTAN. QazAqparat - Ortalyq áıelder qolóner kásibin damytý jáne kópbalaly analardy qoldaý maqsatynda ashylyp otyr, dep habarlaıdy QazAqparat tilshisi.
Qaladaǵy Dostyq úıinde ashylǵan shyǵarmashylyq ortalyqtyń maqsaty - kóneden kele jatqan halyq mádenıeti men dástúriniń qundylyqtary, patrıottyq tárbıe jáne bıznestiń áleýmettik jaýapkershiligin jańǵyrtý men nasıhattaý.
Saltanatty tusaýkeser rásimine memleket qaıratkeri Myrzataı Joldasbekov pen Nur-Sultan qalasynyń ákimi Baqyt Sultanov qatysty.
«Búgingi is-sharanyń orny erekshe, óıtkeni Dostyq úıinde halqymyzdyń qasterli murasyn odan ári jalǵastyratyn qolóner shyǵarmashylyǵy ortalyǵy ashylyp otyr. Bul - Elbasynyń «Uly dalanyń jeti qyry» maqalasynda aıtylǵan ıdeıalaryn oryndaýdaǵy basty bastamalardyń biri. Elbasy «Nur Otan» partııasynyń sezinde kópbalaly, az qamtylǵan otbasylarǵa erekshe mán berý kerektigin basa aıtty. Osy turǵyda ortalyqtyń sheberlik synybynda kópbalaly analarǵa qolóner salasy boıynsha tegin dáris beriletin bolady», - dedi qala ákimi B. Sultanov.
Qolóner shyǵarmashylyǵy ortalyǵynyń ashylý saltanatyna oraı tegin ótkizilip jatqan sheberlik synyptaryna 50-den astam áıel qatysty. Oqý barysynda 5 kópbalaly anaǵa tegin tigin mashınasy berildi.
Uıymdastyrýshylardyń aıtýynsha, ortalyqtyń ashylýy halqymyzdyń mádenı dástúri men qolónerin jańǵyrtýǵa, etnostardyń ejelgi, joıylyp bara jatqan qolónerin, onymen baılanysty óndiris aspaptary men kórkemóner buıymdaryn jınaý boıynsha murajaı qoryn qurýǵa, sonymen qatar oqytý sheberhanalary negizinde áleýmettik kásipkerliktiń damýyna jáne jumyssyz, kópbalaly áıelderdi qosymsha jumyspen qamtýǵa múmkindik beredi.
Sondaı-aq, aıtýly sharaǵa QR Parlamentiniń depýtattary, Qazaqstan halqy Assambleıasynyń músheleri, qoǵam qaıratkerleri, shyǵarmashylyq jáne zııaly qaýym, «Jańǵyrý joly» respýblıkalyq jastar qozǵalysynyń belsendileri qatysty.
