Elordada «Anaǵa taǵzym» alleıasy ashyldy
ASTANA. KAZINFORM – Elordada Halyqaralyq otbasy jáne Analar kúnine oraı «Anaǵa taǵzym» alleıasynyń saltanatty ashylý rásimi ótti, dep habarlaıdy qala ákimdiginiń resmı saıty.
Saltanatty jıynda alǵash bolyp sóz alǵan Astana qalasy Nura aýdany ákiminiń orynbasary Qýanysh Moldabek otbasy ınstıtýtynyń mańyzy, ananyń qoǵamdaǵy róli men urpaq tárbıesindegi jaýapkershiligi týraly aıtty.
– Ana degen bir qolymen besikti terbetse, bir qolymen álemdi terbetedi. «Birinshi baılyq – densaýlyq, ekinshi baılyq – aq jaýlyq, úshinshi baılyq – on saýlyq» dep qazaq ejelden analardyń otbasyndaǵy qadirin erekshe atap kórsetken. Ár adamnyń boıyndaǵy qasıeti, tárbıesi, otansúıgishtigi analarymyzdyń aq sútimen beriledi. Otbasylaryńyzǵa amandyq, qut-bereke tileımin. Ósirip-jatqan ul-qyzdaryńyzdyń qyzyǵyn kórińizder, - dedi Qýanysh Moldabek.
Sonymen qatar Qazaqstan halqy assambleıasy Analar keńesi tóraǵasynyń orynbasary, jazýshy Kamal Álpeıisova, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa múshesi Suńqar Hangeldına, Astana qalasy ákimdigi janyndaǵy Áıelder isteri jáne otbasylyq-demografııalyq saıasat jónindegi komıssııa tóraǵasynyń orynbasary Nazgúl Maqjanova barsha analardy merekesimen quttyqtap, izgi tilekterin bildirdi.
Іs-shara barysynda bala tárbıesi men qoǵamdyq ómirde belsendiligimen tanylǵan analarǵa «Altyn alqa» jáne «Kúmis alqa» tabys etildi.
Uıymdastyrýshylardyń aıtýynsha, bul bastama qalanyń jasyl beldeýin keńeıtip qana qoımaı, turǵyndar arasynda tabıǵatqa janashyrlyq mádenıetin qalyptastyrýǵa baǵyttalǵan.
– Búgin elordada óte maǵynaly is-shara ótip jatyr. «Anaǵa taǵzym» alleıasynyń ashylyp jatqanyna qýanyshtymyz. «Anaǵa taǵzym» degen sózdiń ózi – úlken qurmettiń belgisi. Bul elordamyzǵa kórik beretin oryn bolady dep oılaımyn. Qazaq jyly lebizin bildirgen kezde «japyraǵyń jaıylsyn» degen tilek aıtady ǵoı. Urpaq ana arqyly ósip-ónedi. Ana degen – jaıqalǵan jasyl jelekpen birdeı uǵym. Sol analarymyz sııaqty búgin egilip jatqan bizdiń ár aǵashymyzdyń da japyraǵy jaıylyp, bul jer janǵa saıa kórikti orynnyń birine aınalsyn dep tileımin, - dedi QR Eńbek sińirgen qaıratkeri, ánshi Svetlana Aıtbaeva.
Eske salsaq, buǵan deıin Astanada jóndeýden ótken úsh aýla paıdalanýǵa berilgenin jazǵanbyz.
