Elordada Amangeldi Imanovtyń 150 jyldyǵyna arnalǵan brendbýk tanystyryldy
Logotıptiń avtory - tanymal sýretshi, ıllıýstrator, dızaıner, Qazaqstan sýretshiler Odaǵynyń múshesi Almas Syrǵabaı. Ol sonymen qatar Ult ustazy Ahmet Baıtursynulynyń 150 jyldyǵyna arnalǵan merekelik sharalar men kórnekti tulǵany nasıhattaýda paıdalanylǵan logotıptiń avtory.
«Qazir áleýmettik jelilerde túrli bredbýktar bar. Ony jastar óte jaqsy qabyldaıdy, biledi. Sol sebepti biz de Amangeldi Imanovtyń 150 jyldyǵyǵa arnap, osyndaı brendbýk ázirledik. Olar fýtbolka, bas kıim, bloknot jáne kitaptardyń basty betine ornalastyrý úshin arnaıy ólshem men stıldik erekshelikterdi esekere otyryp daıyndalǵan. Logotıptiń negizine ataqty Ábilhan Qasteev atamyz salǵan Amangeldi batyrdyń obrazyn aldyq. Bul jerde batyrdyń kózinen onyń minezin baıqaýǵa bolady. Monýmentaldy tártipterdi saqtap, grafıkanyń tilimen osyndaı dúnıe jasadyq», - dedi sýretshi.
Sonymen birge, «Amangeldi Imanov» qoǵamdyq qorynyń basshysy Tolqyn Sultan halyq batyrynyń 150 jyldyǵyn atap ótý aıasynda qandaı sharalar uıymdastyrylatynyna toqtaldy.
«Bıyl halyq batyry Amangeldi Imanovtyń týǵanyna 150 jyl tolady. Bul oraıda barlyq is-sharalardy tek qoǵamdyq qor uıymdastyrmaıtynyn atap ótkim keledi. Elordada birqatar sharalardy uıymdastyrýmen jáne ótkizýmen aınalysatyn jumys toby quryldy. Olar mádenı, sporttyq jáne rýhanı-aǵartý baǵytyndaǵy sharalardy ótkizedi. Biz Qostanaı oblysy Amangeldi aýdanynyń ákimdigimen jáne óńir ákimdigimen tyǵyz jumys isteımiz. Biz olarmen únemi keńesip, usynystar aıtyp otyramyz», - dep josparlarymen bólisti Tolqyn Sultan.
Qor basshysynyń málimdeýinshe, 3 sáýir - Amangeldi Imanovtyń týǵan kúnine oraı, QR Ulttyq mýzeıinde ǵylymı-praktıkalyq konferentsııa ótkizý josparlanýda. Onda 1916 jylǵy ult-azattyq kóteriliske baılanysty qundy jádigerler men derekter usynylady. Sonymen qatar, Astana qalasy ákimdiginiń uıymdastyrýymen E.Rahmadıev atyndaǵy Memlekettik akademııalyq fılarmonııasynda kontsert ótkpek. Kesh barysynda Amangeldi Imanovqa arnalǵan shyǵarmalar oryndalady.
«Biz Qazaqstan kompozıtorlar Odaǵy osy sharǵa óz úlesimizdi qosqymyz keledi. Ózderińiz biletindeı, kezinde Muqan Tólebaev pen Evgenıı Brýsılovskııdiń «Amangeldi» operasy shyqty. Odan basqa da tanylmal kompozıtorlardyń batyrǵa arnaǵan shyǵarmalary bar. Olardyń barlyǵyn 3 sáýirde ótetin kontsertten tamashalaı alasyzdar. Men kompozıtor bolǵannan keıin, óz úlesimdi qosaıyn dep qazir shyǵarma jazý ústindemiz. Sonyń tusaýkeserin eki orkestrdi qosyp, ataýly dataǵa oraı jasasaq degen josparymyz bar», - dep toqtaldy Qazaqstan kompozıtorlar Odaǵy Astana qalalyq fılıalynyń tóraǵasy Serikjan Ábdinurov.
