Elordada alyp sýretterdiń baıqaýy bastaldy
NUR-SULTAN. QazAqparat - «URBAN ART ASTANA» kóshe óneriniń II festıvaline arnalǵan baıqaý jarııalandy, dep habarlaıdy QazAqparat tilshisi.
Ótken jyly Qazaqstannyń astanasynda URBAN ART ASTANA Halyqaralyq kóshe óneriniń tuńǵysh festıvali uıymdastyrylǵan bolatyn. Sol kezde qazaqstandyq jáne sheteldik sýretshiler Saryarqa aýdanyndaǵy 8 úıdiń qasbetine sýret saldy. Sýretshilerdiń arasynda 310 toby, Maksım Revansh, Evgenıı Ches jáne basqa da sýretshiler boldy. Sonymen qatar, festıval aıasynda Mámbetov kóshesi boıynda «Ashyq aspan astyndaǵy galereıa» jáne «Kitaphana» atty birneshe arnaıy joba iske asty.
«Osy tabysty tájirıbeni jalǵastyra otyryp, bıylǵy festıvaldiń kókjıegi keńeıe tústi. 2019 jyly ótetin URBAN ART ASTANA tek Saryarqa aýdanyn ǵana emes, Baıqońyr men Almaty aýdandaryn da qamtıtyn bolady», - delingen festıvaldiń resmı saıtynda.
Osy joly festıvalge Germanııa, Portýgalııa, Ulybrıtanııa, Ýganda, Indonezııa, Vengrııa, Reseı, Italııa, Shveıtsarııa, Bolgarııa, Ispanııa, Rýmynııa, Belgııa, Ázirbaıjan, Meksıka, Brazılııa, Fılıppın, Frantsııa, AQSh, Argentına, Japonııa, sondaı-aq, Qazaqstannyń birneshe sýretshisi qatysyp otyr. Ádil qazylar alqasy óz baǵasyn berdi. Endi, halyq arasynda daýys jınaý bastalyp otyr. Úzdik dep tanylǵan sýretter elorda ǵımarattarynyń qasbetterine salynady. Bıylǵy festıvalge qatysyp jatqan sýretshilerdiń shyǵarmalarymen myna jerde tanysýǵa bolady. Sol jerde daýys berýge de múmkindik bar.
Aıta keteıik, ótken jyly QazAqparat tilshisi elordany aralap, byltyrǵy festıvaldiń jeńimpazy atanǵan sýretshilerdiń shyǵarmalaryn kórip shyqqan bolatyn.
