Elordada Almaty jáne Qostanaı oblystarynyń azyq-túlik jármeńkesi ótedi
NUR-SULTAN. QazAqparat - 7-8 qyrkúıek kúnderi «Han-Shatyr» saýda ortalyǵy alańynda ótetin aýylsharýashylyq taýarlarynyń jármeńkesinde Almaty jáne Qostanaı oblystarynyń taýar óndirýshileri óz ónimderin usynatyn bolady, dep habarlaıdy QazAqparat elorda ákimdiginiń resmı saıtyna silteme jasap.
Eki óńirden 31 aýdan jáne 6 qalanyń taýar óndirýshileri óz ónimderin elordalyqtarǵa tómen baǵada usynady. Jármeńke eki kún boıy saǵat 9.00-den 18.00-ge deıin jalǵasady.
Almaty oblysynyń kásiporyndary quny shamamen 163,0 mln teńge bolatyn 330,9 tonna aýylsharýashylyq ónimderin satýdy josparlap otyr. Sonymen birge, Qostanaı oblysynan 200 mln teńgeniń 380 tonna ónimi satylymǵa shyǵarylady.
Satylatyn ónimder assortımenti baı. Barlyq túrdegi iri qara mal eti, shujyq jáne etten jasalǵan jartylaı fabrıkattar - 102,9 tonna, sút ónimderi - 49,5 tonna, kartop pen kókónister - 204 tonna, jemister - 32,2 tonna, balyq ónimderi - 15,7 tonna, bal - 0,5 tonna, jarma men makaron ónimderi - 30 tonna, naýbaıhana men kondıterlik ónimder ónimder - 20 tonna, jumyrtqa - 20 myń dana, un - 50 tonna, basqa da ónimder - 88,5 tonna.
«Barlyq ónimder sanıtarlyq jáne veterınarlyq talaptarǵa saı. Óndirýshilerde satylatyn ónimderdiń shyǵýy, sapasy men qaýipsizdigin rastaıtyn qujattar bar», - delingen habarlamada.
Sonymen qatar, jármeńke kezinde eki oblystyń óner ujymdary astanalyqtarǵa kontserttik baǵdarlama usynady.
