Elordada Almatynyń tarıhı fotosýretteriniń úsh kúndik kórmesi ashyldy
ASTANA. KAZINFORM – Elordada QR Prezıdenttik ortalyǵynda Almatynyń tarıhy jáne táýelsizdiktiń alǵashqy jyldary taqyrybyndaǵy úsh kúndik fotokórme jumysyn bastady.
«Obektıv jáne ekran júzinde: Almaty — Táýelsizdiktiń altyn besigi» atty fotokórmege qalanyń sonaý 1920-30 jyldardaǵy fotolary da qoıylǵan.
QR Ortalyq kınofotoqujattar jáne dybys jazbalar muraǵatynyń dırektory Іlııas Ysqaqovtyń aıtýynsha, Táýelsizdik kúni qarsańynda osyndaı mádenı-aqparattyq sharanyń uıymdastyrylýynda tereń mán bar.
«Almatynyń egemen el bolyp qalyptasýymyzdaǵy róli úlken. Ol qala bizdiń táýelsizdik alǵannan keıingi alǵashqy astanamyz ǵana emes. Memleketimizdiń qalyptasýy sol jerde bastaldy. Zııaly qaýym, bilimdi jastar – bári sol Almatyda ósip-óndi, damydy, jetildi. Táýelsizdikti alǵash jarııalaǵan, tuńǵysh Konstıtýtsııamyzdy qabyldaǵan shahar. Sondyqtan osyndaı mańyzdy mereke qarsańynda ol qalanyń ótkenin taǵy bir eske alyp, mán-mańyzyn tereńirek túısinip qoıý – biz úshin úlken borysh», - dedi ol.
QR Respýblıkasynyń tuńǵysh Prezıdenti Nursultan Nazarbaevtyń ant qabyldaý rásimin de, Banknot fabrıkasynyń ashylýynda, alǵashqy Konstıtýtsııany resmı usyný saltanaty kezinde, Memlekettik Týdyń eskızin talqylaý kezinde túsirilgen fotolardy da kórmeden taba alasyz.
Nursultan Nazarbaevtyń ant qabyldaý rásimi
Banknot fabrıkasynyń ashylýy
Memlekettik Týdyń eskızin talqylaý kezi
Konstıtýtsııany resmı usyný saltanaty
Áıgili «Qazaqstan» qonaq úıiniń salynyp jatqan sátin taspalaǵan fotony da tamashalaýǵa bolady.
Áıgili «Qazaqstan» qonaq úıi salynyp jatqan sát. 1976 j. Marýnın.
Kórme – tegin. Aldaǵy úsh kúnde qala turǵyndary men qonaqtaryna arnaıy ekskýrsııa jetekshileri qyzmet etedi.
