Elordada alıment tólemegen turǵyn kóliginen aıyryldy
NUR-SULTAN. QazAqparat – Elordanyń sot oryndaýshylary alıment boıynsha boryshkerdiń avtokóligin tárkiledi, dep habarlaıdy QazAqparat tilshisi.
Aıta keteıik, Nur-Sultan qalasy óńirlik jeke sot oryndaýshylarynyń palatasy bir aıdan beri alıment tólemeı júrgenderdi izdestirý boıynsha reıd júrgizýde.
Osy oraıda zań talaptaryn oryndamaı júrgen bir boryshker anyqtaldy. Ol óziniń balasyna 2016 jyldan beri alıment tólemeı kelgen. Sáıkesinshe, qaryzy 3 014 961 teńgege jetti.
«Tıisti qaýly engizilip, jeke sot oryndaýshy boryshkerdi izdep tapty. Elordalyq jol polıtseılerimen birlesip, avtokóliktiń tehnıkalyq pasporty men kilti tárkilendi. 2014 jyly shyǵarylǵan Toyota Camry 55 markaly avtomobıl aıyp turaǵyna qoıyldy. Endi mamandar kólik quralyn baǵalap, ony aýktsıonǵa shyǵarady. Osy arqyly boryshker óziniń balasy aldyndaǵy bereshegin óteı alady», - dedi Nur-Sultan qalasy óńirlik jeke sot oryndaýshylarynyń palatasy jetekshisiniń orynbasary Mádına Janasaeva.
