Elordada alǵashqy qońyraý soǵyldy
ASTANA. KAZINFORM — Búgin elimizde bilim kúnine oraı barlyq mektepte saltanatty is-shara ótti.
Astanadaǵy biz barǵan № 79 mektep lıtseıde 3397 oqýshy bilim alyp jatyr.
Bıyl 1 synypqa 287 búldirshin qabyldandy.
Saltanatty is-shara memlekettik týdy shyǵaryp, ánurandy oryndaýdan bastaldy.
Odan ári 1 synyp oqýshylary sap túzedi.
Shara barysynda án aıtylyp, taqpaq oqyldy jáne mektep tabaldyryǵyn attaǵan balalarǵa álippe taratyldy.
— Qurmetti qonaqtar, ustazdar men oqýshylar sizderdi bilim kúnimen shyn júrekten quttyqtaımyn. Qurmetti búldirshinder búgin sizder úshin erekshe kún, alǵash mektep tabaldyryǵyn attap, bilim álemine qadam basyp otyrsyzdar. Qurmetti ata-analar, búgin sizdermen birge balalaryńyzda jańa ómirge qadam basyp otyr, aldaǵy ýaqytta olar bilim alyp, ósip jetilip sizderdiń úmitti aqtaıdy dep senemin. Balalardyń ár qadamyna qýanyp, olardyń jetistigine ortaqtasyp júre berińizder. Qurmetti ustazdar, jańa oqý jyly sizder úshin shyǵarmashylyq tabysqa, jańa jetistikter men qýanyshty sátke toly bolsyn. Sizderdiń eńbek urpaq tárbıesiniń negizi, bolashaqtyń bastaýy. Shákirtterińizdiń ár jetistigi sizderdiń qajyrly eńbegińizdiń jemisi. Sizderge myqty densaýlyq, shabyt jáne qýanysh tileımin, — dep quttyqtady mektep-lıtseı dırektory Qanat Baısalbaev.
Aıta ketsek, Oqý-aǵartý mınıstrliginiń málimetinshe, bıyl 360 myń bala mektep tabaldyryǵynan alǵash ret attap otyr.
Sondaı-aq Oqý-aǵartý mınıstri Ǵanı Beısembaev qazaqstandyqtardy jańa oqý jylynyń bastalýymen quttyqtady.