Elordada alǵash ret úshsaıystan jarys ótti (FOTO)
ASTANA. QazAqparat - Jeksenbi kúni Astanalyq saıabaqta 200 astam adam Super sprint triathlon Astana - 2016 jarysynda sheberlik baıqasty. Jarys úsh kezeńmen ótkizildi: 350 metrge júzý, velosıpedpen 20 shaqyrymdy baǵyndyrý jáne 2,5 km júgirý, dep habarlaıdy qalanyń resmı saıty.
Parkke jarysqa qatysýshylardy qoldaý úshin jankúıerler de jınaldy. Sportshylar Esil ózeninde júzgen soń velosıpedke otyrdy. Belgilengen qashyqtyqty baǵyndyrǵannan keıin júgirýge qatysty.
Astana qalasynyń sport jáne dene shynyqtyrý basqarmasynyń basshysy Berik Marjyqpaev elorda turǵyndary men qonaqtaryna alǵys aıtyp qana qoımaı, ózi de jarysqa qatysty.
- Jarysqa qatysqandyqtan onyń ne ekenin bilemin, bul sportta denege erekshe talaptar qoıylady. 350 metrge júzý ońaı emes eken. Búgingi sport merekesi jaqsy ótti. Kóńil kúı keremet. Qatysýshylardyń 147-si áýesqoı, 27-si kásipqoı sportshy, menińshe, bul úlken jetistik, barshaǵa qatysqandary úshin alǵys aıtamyn, - dedi Berik Marjyqpaev.
Úshsaıysqa 18 jastaǵy jáne odan asqandar qatysty. Márege jetkende jeńimpazdar birneshe sanat boıynsha anyqtaldy. Árbir qatysýshynyń ýaqyty tirkeý kezinde berilgen jeke chıptiń kómegimen belgilendi.
Erler arasynda úsh qashyqtyqty 54 mınýt 48 sekýndta baǵyndyrǵan Aleksandr Avtýshko absolıýtti jeńimpaz atandy. Áıelder arasynda 1 saǵat 9 mınýt ýaqyt kórsetkishimen onyń jubaıy Anastasııa Avtýshko úzdik atandy. Kásipqoılardyń sporttyq áýleti trıatlonnan jarysqa Shymkentten keldi.
- Trıatlonnan burynnan aınalysyp kelemiz, men 2002 jyldan beri , jubaıym 2008-den bastap. Bala kezimde dostarym shaqyrǵan, ýaqyt óte kele bul sport túrimen etene tanystym. Úsh túrli sport, óte qyzyq. Bári jaqsy ótti, uıymdasqan. Búgin aýa raıy óte jaqsy, - deıdi Aleksandr Avtýshko.
Aıta keteıik, uıymdastyrýshylar úshsaıystan jarysty dástúrge aınaldyrýdy josparlap otyr. 
