Elordada alǵash ret revmatologııa ortalyǵy ashyldy
ASTANA. KAZINFORM – Elordada alǵashqy revmatologııa ortalyǵy ashyldy. Endi naýqastar uzaq kezek kútpeı-aq, aýrýhanaǵa jatyp emdele alady, dep habarlaıdy elorda ákimdiginiń resmı saıty.
Revmatologııa ortalyǵy «Qalalyq kópsalaly ftızıopýlmonologııa jáne ishki aýrýlar» ortalyǵynda ashyldy.
– Bul ortalyqtyń ashylýy – Astanadaǵy densaýlyq saqtaý júıesin damytý úshin mańyzdy kezeń. Buǵan deıin qalada revmatologııa salasy boıynsha mamandandyrylǵan statsıonar bólimshe joq edi. Endi býyn aýrýyna shaldyqqan naýqastarǵa medıtsınalyq kómek qoljetimdi bolady. Em qabyldaý úshin kútý merzimi qysqaryp, zamanaýı em-dom tásilderi qoldanylady, - dedi ortalyq basshysy Anna Tsepke.
Buǵan deıin naýqastar 6-7 aı kezek kútetin edi.
Osyǵan deıingi qalypty ahýaldyń saldarynan naýqas aýrýhanaǵa jatý úshin alty-jeti aıǵa deıin kezek kútýge májbúr boldy; naýqastar kóbine shuǵyl jaǵdaı boıynsha aýrýhanaǵa tústi; bazıstik jáne gendik-ınjenerlik bıologııalyq terapııany ýaqytyly taǵaıyndaý múmkindigi shekteldi.
– Emdeýdi uzaq kútýden aýrý asqynyp, naýqastyń múgedektigi artýy múmkin. Jańa revmatologııa ortalyǵy osy máselelerdi júıeli túrde sheshýge baǵyttalǵan, - dep habarlady qalalyq qoǵamdyq densaýlyq saqtaý basqarmasy.
Revmatologııa ortalyǵynyń ashylýy mamandandyrylǵan statsıonarlyq kómektiń qoljetimdi bolýyna, aýrýhanaǵa jatý men keńes alýdy kútý merzimin qysqartýǵa, zamanaýı em-domdy ýaqytyly taǵaıyndap, naýqastyń densaýlyǵyn ońaltýǵa, aýrýdyń aýyr jáne asqynǵan túrin azaıtýǵa, emdeý kezinde dárigerlerdiń mýltıdıstsıplınar tásilin paıdalanýyna, naýqastardyń ómir súrý sapasy arttyrýǵa yqpal etedi.
Revmatıka aýrýy – býyn men bulshyq etke qatysty sozylmaly dert. Revmatıka aýrýyna emdeý úshin erte dıagnostıka men turaqty baqylaý, sondaı-aq zamanaýı em-dom taǵaıyndaý qajet.
Aıta ketsek, budan buryn ІІM gospıtalinde polıtsııa qyzmetkerlerine arnalǵan ońaltý ortalyǵy ashylǵanyn habarlaǵanbyz.
