Elordada alǵash ret Astana ákiminiń kýbogy úshin taekvondodan týrnır ótip jatyr
ASTANA. QazAqparat - Búgin Astanada «Dáýlet» sport kombınatynyń bazasynda Astana qalasy ákiminiń kýbogy úshin taekvondodan týrnırdiń saltanatty ashylýy ótti. Sharany elorda ákimdigi, Koreıa Respýblıkasynyń Qazaqstandaǵy elshiligi G-Global halyqaralyq hatshylyǵymen birlesip uıymdastyrdy. Saltanatty sharaǵa Koreı mádenı ortalyǵynyń dırektory Lı de Von jáne elordanyń Dene shynyqtyrý jáne sport basqarmasynyń basshysy Berik Marjyqpaev qatysty.
Týrnır eki kúnge jalǵasady jáne oǵan 6-17 jas aralyǵyndaǵy 500-den asa jas sportshy qatysýda. Astana qalasynyń atynan jarysqa 160 bala túsedi.
«Bul eń aldymen elorda brendin damytý jáne nyǵaıtýǵa, salaýatty ómir saltyn nasıhattaýǵa baǵyttalǵan ımıdjdik joba. Aldaǵy ýaqytta jyl saıyn ótkizip, ıgi dástúrge aınaldyrmaqpyz. Jarysqa memlekettik mekemeler de, jeke sport sektsııalary da, taekvondo mektepteri de qatysýda», - deıdi Astana q. taekvondo federatsııasynyń prezıdenti, Beıjińdegi Olımpıada oıyndarynyń qola júldegeri Arman Chılmanov.
Kadetter jáne jasóspirimder toptarynda 12 jastan asqan balalardyń baldary dástúr boıynsha elektrondyq túrde júrgiziledi.
Uıymdastyrýshylardyń aıtýynsha, jarystyń birinshi kezeńinde jasóspirimder arasyndaǵy jekpe-jekterde Astana, Almaty jáne Ońtústik Qazaqstan oblysynyń komandalary jaqsy nátıjeler kórsetti. Alda ótetin sheshýshi kezeńderde kishi jas toptaryndaǵy jeńimpazdardy tóreshiler anyqtaıdy. Úzdik komanda elorda ákiminiń kýbogyn ıelenedi.
