Elordada áleýmettik osal toptaǵy oqýshylarǵa kómek 40 myń teńge kóleminde ulǵaıtyldy

NUR-SULTAN. QazAqparat - Áleýmettik osal toptaǵy balalardy qoldaý aktsııasy 18 tamyzda bastalady. Nur-Sultan qalasy ákimdiginiń málimetine qaraǵanda, osy sanattaǵy oqýshylarǵa kómek mólsheri 40 teńgeni qurap otyr, dep habarlaıdy QazAqparat tilshisi.

Elordada jańa oqý jyly qarsańynda balalardy mektepke daıyndaý, onyń ishinde áleýmettik áljýaz toptaǵy oqýshylarǵa qoldaý kórsetý is-sharalary bastaldy.

Jyl saıyn Qazaqstan Respýblıkasy Úkimetiniń 2008 jylǵy 25 qańtardaǵy № 64 qaýlysynyń negizinde jalpyǵa mindetti orta bilim berý aıasynda áleýmettik áljýaz toptaǵy mektep oqýshylaryna materıaldyq kómek kórsetiledi.

Jalpyǵa mindetti orta bilim berý qory sheńberinde, kıim, aıaq kıim, qajetti oqý quraldaryn satyp alý qarastyrylǵan.

Erejedegi sońǵy ózgeristerge sáıkes, kómek kórsetý Qazaqstan Respýblıkasynyń Ulttyq Kásipkerler palatasy usynǵan ónim jetkizýshiler arqyly júrgiziledi. Ótken jyly 30 myń teńge kóleminde sertıfıkat túrinde 12 690 oqýshy kómek aldy.

«Bıyl áleýmettik kómek mólsheri bir balaǵa 40 myń teńge kóleminde ulǵaıtyldy. 17 myńǵa jýyq oqýshyny qamtýdy josparlap otyrmyz», - dedi brıfıng barysynda bilim basqarmasynyń basshysy Sholpan Qadyrova.

Ata-analardyń kómek kórsetý qyzmetterin jaqsartý týraly usynystary men pikirlerin eskere otyryp, «Atameken» ulttyq kásipkerler palatasymen birigip balalardyń jeke kólik kartalaryn qoldaný arqyly jańa mehanızm ázirlengen. Joǵaryda aıtylǵan 40 myń teńge balanyń kólik kartasyna 40 myń birlik túrinde toltyrylady.

«Ata-ana taýardy tańdap, satýshyǵa balanyń kólik kartasyn usynady. Satýshy, arnaıy baǵdarlama arqyly, tańdalǵan taýardyń aqysyn kartadan birlik retinde alady.

Áleýmettik birlikterdiń qozǵalysy jeke kabınetterde baqylanady, bul qarajattyń ashyqtyǵy men maqsatty paıdalanylýyn qamtamasyz etedi», - dep túsindirdi Sh.Qadyrova.

Basqarma basshysynyń aıtýynsha, ótken jyly ónim sapasy men assortımentine qatysty syn kóp aıtylǵan.

«Sondyqtan, biz «Atameken» ulttyq kásipkerler palatasymen birlesip, qatysýshy kompanııalar men saýda núktelerin ulǵaıtý boıynsha jumys júrgizdik. Eger ótken jyly 10 kompanııa men 16 saýda orny bolsa, bıyl 16 kompanııa men 27 saýda orny bolady», - dedi bilim basqarmasynyń basshysy.

Qazirgi ýaqytta mektepterde balalar derekterin avtomattandyrylǵan júıege eńgizý jumystary júrgizilýde, derekterdiń jańartylýyna jáne mártebesiniń rastalýyna qaraı engiziledi.

Jalpyǵa mindetti orta bilim berý qorynan kómek alý úshin ata-analar balasy oqıtyn mektepke ótinish jazady.

Ótinishti 15 jumys kúni ishinde mekteptiń alqaly uıymy qaraıdy.

Jalpyǵa mindetti orta bilim baǵdarlamasynyń áleýmettik kómek mólsheri 40 myń teńgege deıin ulǵaıtyldy

Ata-analar úshin saýda oryndarynyń meken-jaılary kórsetilgen jadynama ázirlenip, olar «QAMQOR» logotıpimen belgilenedi.

«Erteńnen, ıaǵnı 18 tamyzdan baǵdarlamany bastap, 31 qazanda aıaqtaýdy josparlap otyrmyz.

Sonymen birge, ata-analardan saýda oryndarynda satyp alýshylar arasyndaǵy araqashyqtyqqa qoıylatyn talaptardy ıaǵnı 1 metr qashyqtyqty, maska taǵý tártibin saqtaýdy, qoldy antıseptıkpen óńdeýdi suraımyz. Bul balalar men eresekterdiń densaýlyǵy men qaýipsizdigin qamtamasyz etýdiń jalǵyz joly ekenin aıtqym keledi», - dedi spıker.

Eske salaıyq, jalpyǵa mindetti orta bilim berý qory sheńberinde kıim, aıaq kıim, qajetti oqý quraldaryn satyp alý, oqý ornynda tamaqtaný, mekteptegi mádenı-buqaralyq jáne sporttyq sharalarǵa qatysý qamtamasyz etiledi.

Jergilikti ókildi organdar qala syrtyndaǵy jáne mektep janyndaǵy lagerlerge joldamalar berý úshin jergilikti bıýdjetterde qosymsha qarajat kózdeýge quqyly.