Elordada áleýmettik qyzmet kórsetý ortalyǵyna bólingen 200 mln teńge jymqyrylǵan

NUR-SULTAN. QazAqparat – Nur-Sultan qalalyq máslıhatynyń otyrysynda áleýmettik-mádenı damý máselesi jónindegi turaqty komıssııasynyń múshesi Lázzat Razbekova-Túleýhanova astanadaǵy áleýmettik qyzmet kórsetý ortalyqtaryndaǵy zańsyzdyqtar týraly málimet berdi, dep habarlaıdy QazAqparat tilshisi.

«Búgingi otyrysqa daıyndyq kezinde biz memlekettik organdardyń basshylarymen sóılestik. Olardyń ózderi «Qoljetimdi orta» jol kartasynyń qyzmetteri qalanyń búkil aımaqtarynda keńinen taralmaǵanyn moıyndap otyr. Bir ǵana «Nurly júrek» ortalyǵynda 200 mln teńgeden astam qarajat jymqyrylǵan. Búkil derlik oryndarda tárbıelenýshilerge qoldaý kórsetý josparyn formaldy iske asyrý kezdesedi», - dedi ol.

Aıtýynsha, keıbir ortalyqtarda sanıtarlyq qaýipsizdik talaptary óreskel buzylǵan.

«Joǵaryda atalǵan zańsyzdyqtarǵa laýazymdy tulǵalardyń óziniń fýnktsıonaldyq mindetterine nemquraıdy qaraýy sebepker bolyp otyr deýge negiz bar. Tıisti baqylaý bolmaǵandyqtan, Qazaqstan zańnamasyn durys bilmegendikten zańsyzdyqtarǵa jol berilip o t yr», - dedi máslıhat depýtaty.