Elordada áleýmettik kásipkerlik uıymdarynyń sany tórt ese ósti

NUR-SULTAN. QazAqparat - Búgingi tańda elordada áleýmettik kásipkerlik baǵytynda tıimdi jumys isteıtin segiz uıym jumys isteıdi, dep habarlaıdy QazAqparat qala ákimdigine silteme jasap.

Osy baǵyttyń mańyzdylyǵyn eskere otyryp, Nur-Sultan qalasy ákiminiń orynbasary áleýmettik kásipkerlikti qoldaý boıynsha jumysty kúsheıtýdi tapsyrdy.

«Prezıdent «Syndarly qoǵamdyq dıalog - Qazaqstannyń turaqtylyǵy men órkendeýiniń negizi» atty Joldaýynda atap ótkendeı, áleýmettik kásipkerlik - memleket te, bıznes te, úkimettik emes uıymdar da damýdyń mańyzdy sektory. Onyń mańyzdy bóligi «Áleýmettik kásipkerlik týraly» zańdy ázirleý qajettiligine arnaldy, bul úshin sizderden bastamalardy jetildirýde qoǵam ıgiligine qyzmet etetin áleýetti usynystar men ıdeıalar kútemiz. Osyǵan oraı, iQala jobasy aıasynda áleýmettik kásipkerlikti qoldaý boıynsha jumysty jalǵastyrý qajet», - dedi Baqtııar Máken.

Esterińizge sala keteıik, iQala qalalyq qyzmet kórsetý ortalyǵy ótken jyly ashylǵan bolatyn. Onda kásipkerler barlyq anyqtama men ruqsatty «bir terezeden» alady.

Aıta keteıik, aqpan aıynda elordada azamattyq bastamalar men áleýmettik baǵyttaǵy kommertsııalyq emes uıymdardy qoldaý maqsatynda Azamattyq bastamalar ortalyǵy quryldy. Ortalyq ÚEU-ny damytý men nyǵaıtýǵa kómektesedi, elorda turǵyndaryn qoǵamnyń áleýmettik mańyzdy máselelerin sheshý protsesterine belsendi qatystyrady.

Ortalyqtyń qatysýymen júzege asyrylatyn jobalar negizinen erekshe balalar tárbıelenetin otbasylar, halyqtyń áleýmettik osal toptary, kópbalaly otbasylar ómirin jaqsartýǵa qatysty. Sondaı-aq ekologııalyq máseleler, ınklıýzıvti bilim berý, ulttyq biregeılikti jańǵyrtý jónindegi ıdeıalar júzege asyrylyp jatyr.