Elordada áleýmettik álsiz sanattaǵy otbasylardyń balalaryna qandaı kómek kórsetiledi
Basqarma ókiliniń aıtýynsha balalardyń jumysqa jegilýin boldyrmaý úshin memlekettik organdar ata-analarmen túsindirý jumystaryn júrgizedi. Jasóspirimderdiń quqyǵyn qorǵaý baǵytynda memlekettik áleýmettik tapsyrys ta qarastyrylǵan.
«Memlekettik tapsyrys aıasynda sondaı-aq balalardyń qylmysynyń aldyn alýǵa baǵyttalǵan aqparattyq materıaldar men vıdeorolıkter ázirlenip, jedel sharalar uıymdastyrylady. Balalar men ata-analardyń qatysýymen sharalar ótkiziledi. Qamqorshylyq organdary ata-ananyń qaraýynsyz qalǵan nemese baqylaýsyz ketken balalardy anyqtaıdy. Osy maqsatta ár mektepte áleýmettik pasport toltyrylady. Muǵalimder óz kezeginde balalary eńbekke tartylýy múmkin otbasylardyń tizimin beredi», - dedi spıker.
Sonymen qatar, orta bilim berý baǵdarlamasy aıasynda áleýmettik turǵydan az qamtylǵan otbasylardyń balalaryna kómek kórsetiledi.
«Áleýmettik sebeptermen balalardyń oqýǵa barmaýyn boldyrmaý úshin jalpy orta bilim berý aıasynda áleýmettik álsiz sanattaǵy balalarǵa kómek kórsetiledi. 2019-2020 oqý jylynda baǵdarlama boıynsha kómek 12 690 bala aldy (ár balaǵa 30 myń teńge kóleminde sertıfıkat berilgen).
Sondaı-aq, jyl boıy biz balalarǵa «Mektepke jol» aktsııasy aıasynda kómek kórsetemiz. 2019 jyly aktsııanyń kómegimen 11 myńnan astam bala qamtyldy. Osy jyldyń basynan bastap 2 myńnan astam bala kómek aldy. Balalarǵa ýaqtyly kómek kórsetý úshin Nur-Sultanda Qıyn ómirlik jaǵdaıdaǵy balalardy qoldaý ortalyǵy jumys jasaıdy. Qalada kámeletke tolmaǵandardyń bos ýaqytyn uıymdastyrý maqsatynda 11 qosymsha bilim berý mekemesi bar, 136 fılıal jumys isteıdi», - deıdi ol.
