Elordada álemniń 40 eliniń karateshileri aıqasady
ASTANA. QazAqparat - Búgin elordadaǵy «Dáýlet» sport kesheninde Shınkıokýshınkaı karateden 6-shy álem chempıonaty bastaldy, dep habarlaıdy QazAqparat.
«Bizdiń týrnır «EKSPO-2017» kórmesi baǵdarlamasynyń bir bóligi sanalady. Óıtkeni sport, onyń ishinde jaýyngerlik jekpe-jek adamdarǵa energııa, tabandylyq, jeńiske degen jiger beredi. Bul karatenyń osy túriniń negizin qalap, damýyna zor eńbek sińirgen azamattardyń Astanada osyndaı týrnır ótkizý armanynyń oryndalǵany», - dedi Qazaqstan Shınkıokýshınkaı karate federatsııasynyń birinshi prezıdenti, QR Prezıdenti ákimshiliginiń basshysy Ádilbek Jaqsybekov álem birshiliginiń ashylý saltanaty barysynda.
Aıta keterligi, bul dodaǵa álemniń Avstralııa, Ázerbaıjan, Aýǵanstan, Bolgarııa, Brazılııa, Ulybrıtanııa, Vengrııa, Grýzııa, Danııa, Indonezııa, Iran, Irak, Ispanııa, Kanada AQSh, Reseı syndy 40 elinen kelgen 193 sportshy qatysýda.
Chempıonat aıasynda 4-6 shilde kúnderi Aqmola oblysynyń Şýche qalasyndaǵy Jaqsy-2 jattyǵý bazasynda karate boıynsha dúnıejúzilik semınar men dúnıejúzilik karate uıymynyń dan biliktilik semınary ótedi.
