Elordada aldanǵan úleskerler sot arqyly aqshalaryn qaıtaryp aldy

ASTANA. QazAqparat - 100-den astam otbasy jaýapsyz qurylys salýshylardan turǵyn úı kesheniniń qurylysyna salynǵan qarjyny sot arqyly qaıtaryp aldy, dep habarlaıdy «QazAqparat» HAA tilshisi Astana qalalyq prokýratýrasynyń baspasóz qyzmetine silteme jasap.

«7 maýsym kúni elordanyń ekonomıkalyq soty aldanǵan 100-den astam otbasynyń múddesin qorǵaǵan qala prokýrorynyń eki talabyn qanaǵattandyrdy», - delingen habarlamada.

Osylaısha, sot «Kapıtal stroı servıs» JShS jaýapsyz qurylys salýshydan «Adam stroı servıs» turǵyn úı-qurylys kooperatıviniń múddesine 300 mln teńge kóleminde aqsha óndirip, qurylysy aıaqtalmaǵan «Granıtnyı 2» turǵyn úı kesheni men jer ýchaskesin berýge mindettedi. 

Sondaı-aq, «Haziret Astana»  TQK-nyń talaby qanaǵattandyrylyp, onyń múddesine «Sheıhkazınvest» JShS-dan 325 mln teńge somasyndaǵy qarjy óndirildi.