Elordada aldanǵan úleskerler Prezıdentten kómek surady

NUR-SULTAN. QazAqparat – Nur-Sultan qalasynda bir top úlesker óz páterlerine kire almaı júr. Sebebi qurylysy áli aıaqtalmaǵan. Májbúri qalmaǵan jandar QR Prezıdentinen kómek surady, dep habarlaıdy QazAqparat tilshisi.

Máselesi 2017 jyldan beri sheshilmeı kele jatqan úleskerlerdiń endigi úmiti Prezıdentte.

Elordadaǵy qurylysy aıaqtalmaǵan «Magıstralnyı-3» turǵyn úı kesheniniń bir top úleskeri áleýmettik jeli arqyly Memleket basshysyna júginip, kómek surady.

Atalǵan máselege qatysty elorda ákimdiginiń ýákiletti uıymy «Elorda qurylys kompanııasy» JShS resmı túsinik berdi.

«Nur-sultan qalasy ákimdiginiń turǵyn úı qurylysyna úlestik qatysý máseleleri jónindegi vedomstvoaralyq komıssııa aıaqtalmaǵan qurylys nysandarynyń tizbesin qarady. Nátıjesinde «Nurly jer» memlekettik baǵdarlamasy sheńberinde bólingen qarajat esebinen problemalyq nysandar qurylysyn aıaqtaýdy qarjylandyrý úshin «Elorda qurylys kompanııasy» JShS ýákiletti uıymyna usynym beredi», - delingen habarlamada.

Habarlamada aıtylǵandaı, odan ári másele prokýratýraǵa jiberilip, sottyń sheshimi shyqqan.

«2019 jylǵy 31 shildede Nur-Sultan qalasy prokýrorynyń talap aryzy boıynsha qalalyq mamandandyrylǵan aýdanaralyq ekonomıkalyq sotynyń sheshimimen «Jas otaý-Narrý Town» turǵyn úı qurylys kooperatıvi úleskerleriniń múddesinde «Atlant Injınırıng» JShS «Kaztehbetonprodakts» JShS, «SIVF.KZ», «Saryarqa-Qurylys» JShS úlesker jarnasynyń sharttaryn buzý arqyly, qarajat óndirildi. Óndirilgen qarajat «Amanat-Komfort» turǵyn úı qurylysy kooperatıvine úlesker jarnasy retinde berildi», - dep habarlaıdy kompanııa.

Sondaı-aq, ákimdiktiń ýákiletti uıymy qurylysy jyrǵa aınalǵan «Magıstralnyı-3» turǵyn úı keshenin salyp jatqan kompanııanyń ishki isine aralasa almaıtyndyǵyn jetkizip, onyń sebebin túsindirdi.

«Amanat-Komfort» turǵyn úı qurylysy kooperatıvi tóraǵasynyń is-áreketine qatysty atalǵan turǵyn úı qurylysy kooperatıvi jarǵy negizinde áreket etetin kommertsııalyq emes, ózin-ózi retteıtin azamattar birlestigi ekenin habarlaımyz. Turǵyn úı qurylysy kooperatıviniń ishki qarjy-sharýashylyq qyzmetine qatysty máseleler kooperatıvtiń jalpy jınalystarynda sheshiledi jáne QR «Turǵyn úı qatynastary týraly» zańymen retteledi. Úleskerler men turǵyn úı qurylysy kooperatıvi arasynda kelispeýshilik týyndaǵan jaǵdaıda másele kelissózder nemese sot arqyly sheshiledi. Osy oraıda ákimdik jáne ýákiletti uıym qoldanystaǵy zańnamaǵa sáıkes turǵyn úı qurylysy kooperatıviniń qyzmetine aralasýǵa quqyǵy joq», - deıdi mekeme ókili.

Odan bólek, resmı jaýapta 2021 jylǵy 6 qyrkúıekte «Amanat-Komfort» TQK jáne «Nurqapstroıgaz» JShS arasynda qurylysty aıaqtaý úshin birlesip qyzmet etý týraly shart jasasqany aıtylǵan.

«Qazirgi ýaqytta «Magıstralnyı-3» turǵyn úı kesheniniń jobalyq smetalyq qujattamasyna túzetý engizýine jáne «Memsaraptama» RMK-niń qaraýynda bolýyna baılanysty qurylys júrgizilmeıdi. Jobany bekitýdiń boljamdy merzimi aqpannyń sońy», - degen jaýap aldyq.