Elordada alaıaq jalǵa alynǵan elektrondy tehnıkalardy lombardqa ótkizip otyrǵan

NUR-SULTAN. QazAqparat - Elordada er adam 20 turǵynnyń elektrondy tehnıkalaryn jalǵa alyp, 12 mıllıon teńgeden astam shyǵyn keltirgen, dep habarlaıdy QazAqparat qalalyq polıtsııa departamentine silteme jasap. Polıtsııa alaıaqtyq jasaǵany úshin buryn sottalǵan 30 jastaǵy er adamdy ustady.

Ol jarnama saıty arqyly elektrondy tehnıkany jalǵa berý týraly habarlandyrýlardy tańdaǵany. Er adam ózin JShS basshysy retinde tanystyra otyryp, klıenttermen telefon arqyly sóılesken. Osylaısha olardyń senimine kirgen. Alǵan jabdyǵyn «sol kúıinde, esh aqaýsyz qaıtaramyn» dep ýáde bergen. Belgili bir somaǵa kelisken soń, jaldaý aqysyn tólegen. Sodan keıin jabdyqty jalǵa alyp, merzimin 3-4 kúnge uzartyp otyrǵan. Alaıda keıin uıaly telefonyn sóndirip, ushty-kúıli joǵalǵan.

Kúdikti tehnıkany birden lombardqa tapsyryp otyrǵan. Alaıaq 14 «PS 5» oıyn konsoli, 7 noýtbýk jáne 20 plazma teledıdardy ıemdenip ketken.

Ustalǵan adamǵa qatysty qylmystyq is qozǵaldy. Ol ýaqytsha tergeý ızolıatoryna qamaldy.

Nur-Sultan qalasynyń polıtsııa departamenti azamattarǵa qyzmetter men taýarlardyń durystyǵyn tekserýdi, kúmándi mámileden bas tartý kerektigin eskertedi.

Osy adamnnan zardap shekkender Nur-Sultan qalasynyń polıtsııa departamentine, Beıbitshilik kóshesi 19-úıge, 8 [phone] telefonyna nemese «102» nómirine habarlasýyna bolady.