Elordada alaıaq quny 2 mln.teńgeden asatyn balyq ónimin qoımadan alyp shyǵyp, satyp jibergen
ASTANA. 7 aqpan. QazAqparat - Astana qalalyq ishki ister departamentine qaladaǵy jaýapkershiligi shekteýli seriktestik jetekshileriniń biri kelip, belgisiz azamattyń ózderin aldap-arbap 1 tonnadan astam balyq ónimin alyp ketkendigine shaǵymdandy, dep habarlaıdy atalmysh departamenttiń baspasóz qyzmeti.
Osy máselege baılanysty tártip saqshylary júrgizgen jedel-izdestirý sharalarynyń barysynda atalmysh qylmysqa qatysy bolýy múmkin 27 jastaǵy Aqmola oblysynyń turǵyny ustaldy. Tekserý barysynda málim bolǵanyndaı, ustalǵan azamat ózin kóterme satyp alýshymyn dep tanystyryp, balyq ónimderin alyp shyǵýǵa qajetti qujattardy rásimdeýdi suraǵan. Odan soń taýar chekterin qoldan jasaǵan ol balyq ónimderiniń aqysyn tólemesten qoımadan alyp shyǵyp, aldyn ala daıyndalǵan júk kóligine tıeıdi. Sóıtip, alaıaqtyqpen urlap shyqqan taýaryn bazarǵa aparyp satyp jiberedi. Osyǵan baılanysty Almaty aýdandyq Іshki ister basqarmasynyń qyzmetkerleri ustalǵan azamatqa qatysty «alaıaqtyq jasady» degen aıyppen qylmystyq is qozǵady. Tekserý amaldary júrip jatyr.
