Elordada alaıaq er adam 8 áıeldi aldap soqty
Nur-Sultan qalasy Polıtsııa departamentiniń «Esil» aýdandyq polıtsııa basqarmasynyń qyzmetkerleri birqatar alaıaqtyq áreketke barǵan 34 jastaǵy er adamdy ustady.
Tergeý barysynda kúdikti áleýmettik jeli arqyly kóbine 40-50 jas aralyǵyndaǵy áıeldermen tanysyp júrgeni anyqtaldy. Ózin «Almas» ne «Almat» dep tanystyrǵan ol banktiń qaýipsizdik qyzmetinde, keıde memlekettik qyzmette isteıtinin aıtqan. Áıelderdiń senimine kirip, olarǵa belgili bir aqyǵa tabysy joǵary jumysqa ornalastyrý boıynsha túrli qyzmetterin usynǵan. Alaıaqqa senip qalǵan kelinshektiń biri tipti, óz atyna nesıe rásimdep, oǵan uıaly telefon satyp ápergen. Taǵy bir áıeldiń tonyn hımııalyq tazartýǵa tapsyrý jeleýimen ıemdenip alǵan.
Qazirgi kezde tártip saqshylary alaıaqtyń áreketine zardap shekken 8 áıeldi anyqtady. Jedel-izdeý sharalarynyń barysynda kúdikti kinásin tolyq moıyndady. Qazirgi kezde QR Qylmystyq kodeksiniń «alaıaqtyq» baby boıynsha qylmystyq is qozǵaldy. Onyń osyǵan uqsas basqa da qylmystarǵa qatystylyǵy tekserilýde.
Nur-Sultan qalasynyń Polıtsııa departamenti azamattardy qyraǵy bolyp, jete tanymaıtyn adamdarǵa senbeýge shaqyrady. Atalǵan er adamnyń zańǵa qaıshy áreketterinen zardap shekkender bolsa, Polıtsııa departamentiniń myna nómirlerine habarlasa alady: 61-30-68, 71-64-90, 71-65-58. 8-775-601-11-00 nemese 102.