Elordada alaıaq 21 jastaǵy boıjetkenniń atynan onlaın-nesıe rásimdegen
Qalanyń polıtsııa departamentinen habarlanǵandaı, quqyq qorǵaý organyna 21 jastaǵy boıjetken júginip, óz atynan belgisiz bireýdiń nesıe alǵanyn habarlaǵan.
«Buǵan deıin jumys izdegen boıjetken ınternette jarnama jarııalaǵan. Belgisiz bireý oǵan habarlasyp, ózin saýda kompanııasynyń qyzmetkeri retinde tanystyryp, jumys usynǵan. Álgi adam tirkelý úshin jeke kýálik pen bank kartasy týraly málimetterdi messendjer arqyly jiberýin ótinedi. Oıynda eshteńe joq boıjetken jumys berýshiniń barlyq talaptaryn oryndaǵan. Keıin alaıaq kompanııanyń taǵy bir qyzmetkeriniń aqshasy onyń kartasyna túsetinin jáne olar elektrondy ámııanǵa aýdarylýy kerek ekenin aıtyp sendiredi. Onyń ótinishine sengen boıjetken túsken 120 myń teńgeni alaıaqqa aýdarǵan. Al birneshe kúnnen keıin oǵan mıkronesıe uıymynan onlaın-nesıe berilgeni anyqtalady. Kartochkaǵa túsken aqsha - óz atyndaǵy nesıe ekenin boıjetken ańǵarmapty. Aqyry, ol jumys tappaq túgili qaryzǵa kirip ketken», - dep habarlaıdy departamentten.
Atalmysh fakt boıynsha QR Qylmystyq kodeksiniń 190-baby boıynsha sotqa deıingi tergeý amaldary júrgizilip jatyr.
Polıtsııa qyzmetkerleri, ókinishke qaraı, mundaı alaıaqtyqtyń jıi kezdesetinin aıtady. Osyndaı faktiler boıynsha polıtsııaǵa 10-nan astam azamat júgingen. Barlyq jaǵdaıda alaıaqtar jábirlenýshilerdiń qujattary men bank kartasy tarqyly onlaın-nesıe alyp otyrǵan.
Mıkronesıe uıymdary aqshany adamnyń ózi alyp jatqanyn tekserip jatpaı-aq, joǵalǵan qujattarmen de nesıe bere beredi. Nur-Sultan qalalyq polıtsııa departamenti mundaı faktilerdiń aldyn alý úshin turǵyndardy muqııat bolýǵa, jeke qujattar, bank kartalary, CVV-kod pen parol týraly jedel málimetterdi jeli arqyly taratpaýǵa shaqyrady.
