Elordada «Alashtyń Astanasy» atty mádenı-patrıottyq jáne ınteraktıvti óner keshi ótedi
ASTANA. QazAqparat - Astana qalasy Tilderdi damytý basqarmasynyń uıymdastyrýymen 3 maýsym kúni Q.Qýanyshbaev atyndaǵy qazaq mýzykalyq-drama teatrynda Astana kúni merekesine oraı «Alashtyń Astanasy» atty mádenı-patrıottyq, ınteraktıvti óner keshi ótedi.
Bul týraly atalǵan basqarmanyń baspasóz qyzmeti habarlady.
Keshtiń maqsaty - el men jer, til men dil, qazaq rýhanııaty taqyrybyn sazdy áýenmen, syrly saýalmen merekelik kóńil kúıde qozǵaı bilip, kórermenge móldir oı salý bolmaq..
Ol jalyqtyrmaıtyn tarıh, aıta-aıta jaýyr bolmaǵan memlekettik til, áserli de shynaıy Astana, kóńildi tanymdyq suraqtar, az-maz ázil, qulaqtan kirip boıdy alar ásem án, shabyttandyrar ásem bı men tátti kúımen órekteledi. .
Keshtiń júrgizýshileri - Qydyráli Bolman men Qaraqat Ábildına.
Mádenı sharaǵa belgili óner sheberleri Seken Turysbek, Qurmash Mahanov, Marjan Arapbaeva, Dosymjan Tańatarov, Ardaq Balajanova, Klara Tólenbaeva, Medet Salyqov, «Naz» bı ansambli, «Bazar joq» teatry, «Astana tsırkiniń» ónerpazdary qatysady.
Sonymen qatar, kesh barysynda jınalǵan kópshilikpen ulttyq sıpattaǵy vıktorınalyq oıyndar oınatylyp, tanymdyq-ınteraktıvti suraqtar qoıylyp, týǵan tili men tarıhyn jaqsy biletin qonaqtar syı-sııapatqa ıe bolmaq.
