Elordada «Alash amanaty» qoǵamdyq birlestigi sábıdiń tusaýyn kesý rásimin ótkizdi
sp;ASTANA. Jeltoqsannyń 25-i. QazAqparat /Marlan Jıembaı/ - Búgin elordadaǵy «Balapan» balabaqshasynda «Alash amanaty» qoǵamdyq birlestiginiń qazaq halqynyń salt-dástúrin nasıhattaý maqsatynda uıymdastyrǵan sábıdiń tusaýyn kesý rásimi ótti.
Sharaǵa aqyn, Memlekettik syılyqtyń ıegeri Farıza Ońǵarsynova men Astana qalalyq tilderdi damytý basqarmasynyń bastyǵy Orazkúl Azanǵazy, sonymen qatar atalǵan qoǵamdyq birlestiktiń «Ardagerler» hor ujymy qatysty.
Jas balanyń tusaýyn kesken F.Ońǵarsynova «Bıbi Fatıma anamyzdyń qudiretti shapaǵaty tıip, halqymyzǵa maqtanysh bolatyn perzent bolsyn», degen óz tilegin bildirdi.
Al, qalalyq tilderdi damytý basqarmasynyń bastyǵy búgin qazaqtyń dúldil aqyn qyzy Farız Ońǵarsynovanyń da týǵan kúni ekendigin atap ótip, ózi basqaratyn mekeme atynan arnaıy quttyqtaý gramotasyn tapsyrdy.
Onda «Qurmetti Farıza Ońǵarsynqyzy! Sizdi 70 jyldyq mereıtoıyńyzben shyn júrekten quttyqtaımyz. Qazaq ádebıetindegi tumardaı kıeli ornyńyz ben eshkimge uqsamaıtyn bolmys-bitimińiz talaıdy tánti etti. Keıingi urpaqqa úlgi-ónege bolarlyqtaı tálim-tárbıe mektebinen óttińiz. Sondyqtan bolar alýan asý, sony soqpaqtyń jyńǵylymen jylysynda siz salǵan súrleýdiń súreńi ózgeshe», delingen.
Saltanatty shara barysynda F.Ońǵarsynovaǵa «Alash amanaty» qoǵamdyq birlestiginiń atynan shapan kıgizildi.
Aıta keteıik, tusakeser - sábı qaz turǵannan keıin tez júrip ketsin degen tilekpen jasalatyn ǵuryp, yrym. Ol úshin arnaıy ala jip daıyndalady. Tusaý keserdiń jibin daıyndaýdyń birneshe túrleri, joldary, senimderi bar. Jipti kóbeıip, kógere bersin dep kók shópten jasap, baı bolsyn dep maldyń toq isheginen de óredi. Adal bolsyn degen yrymmen ala jipten de jasaıdy.
