Elordada Aqtóbe men Qyzylorda oblystarynyń aýyl sharýashylyǵy jármeńkesi ótip jatyr

ASTANA. KAZINFORM – Elordada Aqtóbe men Qyzylorda oblystarynyń aýyl sharýashylyǵy taýar óndirýshileri 650 tonnadan astam ónim usyndy. Jármeńke sórelerinde et, sút ónimderi, balyq, ulttyq tátti-dámdiler jáne basqa da taýarlar bar, dep habarlaıdy Astana ákimdiginiń resmı saıty.

Jármeńke tańǵy 9-da ashyldy. Osy ýaqytqa deıin-aq munda satyp alýshylar kóp jınalǵan.

– Biz Qyzylorda oblysynanbyz, jerlesterimiz kelgenin estip, arnaıy jetip, kúrish pen qaýyn aldyq. Qyzylorda – kúrishtiń otany, munda qaýyn men asqabaq ta óte dámdi. Sol sebepti barlyǵyn satyp alyp, úıde dám tatýdy jón kórdik. Bıyl kúrish baǵasy ótken jylǵa qaraǵanda arzandaý eken, bul bizdi qýantty, - deıdi Janat esimdi qala turǵyny.

Jármeńke kúni elordalyqtar Aqtóbe oblysynyń shujyq ónimderin de tatyp kórip, satyp aldy. Olar ishki naryqta úlken suranysqa ıe.

– Bizdiń sharýashylyqta shujyq tsehy bar. Ónimderimiz jylqy eti men sıyr etinen jasalady. Shujyq, qaqtalǵan qazy men jaıa, pisirilgen shujyq jáne shıki ónimder – jylqy etinen daıyndalǵan delıkatesterdi usynamyz. Búgingi jármeńkege biz 1 500 tonna ónim ákeldik, - deıdi Aqtóbe oblysynyń Qarǵaly aýdanyndaǵy sharýashylyq ıesi Salıma Úsebaeva.

Aıta keteıik, óńirlerdiń jármeńkeleri elordada jyl saıyn qazan aıyna deıin ár senbi-jeksenbi kúnderi ótkiziledi. Bıylǵy jármeńke «Qazanat» ıppodromynyń avtoturaǵynda (Qarqaraly tas joly, 1) ótip jatyr. Sondaı-aq turǵyndar men qala qonaqtarynyń yńǵaılyǵy úshin jármeńke ornyna №18, №37 jáne №303 avtobýstar qatynaıdy.