Elordada aqparatqa qoljetimdilik máselesi talqyǵa tústi
ASTANA. QazAqparat - Búgin elordada «Tıimdi memlekettik basqarýdyń qazirgi zamanǵy strategııalary: aqparatqa qol jetkizý, esep berý jáne ashyq bolý» atty semınar ótýde.
Shara aldynda BAQ ókilderine suhbat bergen QR Parlamenti Májilisiniń depýtaty Nurlan Ábdirov óz sózinde qoǵamdyq keńes qurý týraly Zań jobasyn Parlament qabyldap, Elbasy N.Nazarbaevtyń qol qoıǵanyn atap óte kele: «Kelesi jyldyń 1 qańtarynan bastap, bul zań óz kúshine enedi. Bizde qazir ártúrli kóptegen komıssııalar men qoǵamdyq keńester respýblıkanyń túpkir-túpkirinde jumys istep jatqanymen olardyń negizgi atqarar qyzmeti belgili bir máselelermen ǵana shekteledi. Al jańadan qurylatyn komıssııanyń jumys aýqymy óte keń. Bul memlekettik, qoǵamdyq turǵydaǵy múddelelerdi qamtıdy. Máselen, óńirdiń, oblystyń, úlken qalanyń bıýdjetiniń jobasyn talqylaý nemese sol óńirdiń, qalanyń bolashaq damý jospary, bıýdjetti oryndaý esebi syndy máseleler qarastyrylady»,- dedi.
Onyń atap ótýinshe, úsh jyl saıyn qoǵamdyq keńestiń aýmaqtyq jáne ortalyq jańa quramy bekitilip otyrady. Aýmaqtyq keńestiń quramyn jergilikti máslıhat bekitse, ortalyq keńes músheleri ortalyq atqarýshy organdardyń buıryǵymen jasaqtalady. Onyń úshten eki bóligi qoǵam ókilderinen bolady. Tipti, jeke azamattar da ózin ózi usyna da alady. Al úshten bir bóligine memekettik organdardyń sheneýnikteri kirýge quqyly. «Ol óte qajet. Mundaı ınstıtýt qoǵam men bıliktiń ortaq ymyraǵa kelýine arnalǵan. Olarda qoǵam úshin, elimiz úshin paıdaly sheshimder qabyldanyp otyrady», - dedi N.Ábdirov.
