Elordada Aqmola oblysynyń mádenıet kúnderi resmı ashyldy
ASTANA-KÓKShETAÝ. QazAqparat - Búgin Astana qalasy ákimdiginiń aldyndaǵy alańda Aqmola oblysy mádenıet kúnderiniń resmı ashylý saltanaty ótti, dep habarlaıdy QazAqparat.
Saltanatty sharaǵa qatysqan Aqmola oblysynyń ákimi Málik Myrzalın óńirdiń mádenı kúnderi elordada 20 maýsymnan bastap 25 maýsymǵa deıin ótetindigin, oǵan aqmolalyq bir jarym myńnan astam ónerpaz qatysatyndyǵyn atap ótti.
«Buǵan qosa, Aqmola oblysy ásem tabıǵatymen, baı tarıhymen, mádenı murasynyń moldyǵymen de erekshelenedi. «Arqanyń kerbez sulýy» atanǵan, jer jánnaty - Kókshetaý qazaqqa Aqan seri, Birjan sal, Balýan sholaq syndy qaıtalanbas tulǵalardy, sal-serilerdi syılaǵan qasıetti meken. Baýyrynda aq qaıyńy terbelip, baýraıynda 80 kóli shalqyǵan Kókshetaýda dástúrli mádenıettiń qaımaǵyn buzbaı, amanatqa adaldyq tanytyp, ulttyń mol rýhanı-qazynasyn dáriptep júrgen ul-qyzdar bar», - dep atap ótti oblys basshysy.
5 kúnge oraılastyrylǵan mádenı shara «EKSPO-2017» halyqaralyq mamandandyrylǵan kórmesine arnalǵan. Mádenıet kúnderiniń aıasynda Aqmola oblysy fılarmonııasynyń kásibı ujymdarynyń, oblystyń eń úzdik shyǵarmashylyq kórkemónerpaz ujymdarynyń gala-kontsertterin, keskindeme sýretteriniń, halyq shyǵarmashylyq sándik-qoldanbaly óner sheberleri jumystarynyń kórme-satylymdaryn, qazaq halqynyń ulttyq dástúrlerin kórsetetin etnoaýyldaǵy teatrlandyrylǵan mádenı-kópshilik is-sharalar men ulttyq sport oıyndaryn tamashalaýǵa múmkindik bar.
