Elordada aqysyz negizde oqytatyn Apple trenıng ortalyǵy ashyldy
ASTANA. KAZINFORM – Apple Authorised Training Center for Education baǵdarlamasyna 400-den astam úmitkerdiń ishinen eń úzdik 60 stýdent irikteldi. Olar iOS-ta mobıldi qosymshalardy qurý úshin barlyq qajetti daǵdy men bilimdi aqysyz negizde ıgeredi.
Stýdentter Apple kompanııasynyń zamanaýı jabdyqtary men qajetti quraldaryna tegin qol jetkizip qana qoımaı, Apple-dyń sertıfıkattalǵan oqytýshylarynan bilim alady.
«2023 jyldyń qazan aıynda biz Apple Authorised Training Center for Education kompanııasymen kelisimge qol qoıdyq. Onyń sheńberinde Astana Hub Qazaqstandaǵy Apple trenıng ortalyǵynyń ókili boldy. Bul ortalyq stýdentterimizge iOS baǵdarlamalaý daǵdylaryn ıgerý múmkindikterin usynyp, ıdeıalaryn júzege asyrýǵa jáne óz mobıldi qosymshalaryn qurýǵa jol ashady. Apple kompanııasymen seriktestigimiz ınnovatsııalyq oılaýdy damytýǵa yqpal etetini anyq. Sonymen qatar Qazaqstandaǵy IT-sektordy damytý úshin stýdentterimizdi ozyq tehnologııalyq sheshimder qabyldaýǵa shabyttandyratynyna senim mol», – dep atap ótti Astana Hub basqarýshy dırektory Danııa Ahmetova.
Elimizde Certified Apple Trainer baǵdarlamasy boıynsha sertıfıkatqa ıe 8 jattyqtyrýshy ǵana bar. Solardyń biri – sertıfıkattalǵan Apple Trainer Smaǵul Negmatov. Ártúrli bilim berý resýrstaryna, sonyń ishinde Apple kompanııasynyń jeke dáristerine qol jetkizý múmkindigi bar jattyqtyrýshy ortalyq stýdentterine bilim berip, tsıfrlyq tehnologııa salasyndaǵy ozyq tájirıbelerge qol jetkizýge baýlıdy.
«IOS ázirleý boıynsha oqyǵan stýdentterimniń basym bóligi elimizdiń iri kompanııalarynda, ásirese Halyk, TsentrKredıt banki, Jusan sııaqty jáne t.b. bank salasynda tabysty jumys isteıdi. Alty aılyq júıeli oqytý barysynda stýdentter óz daǵdylaryn edáýir jetildirip, middle deńgeıine jetti. Bir jyl ishinde ázirleýshiniń middle+, tipti senior iOS deńgeıin meńgergender de boldy», – dedi Apple Certified Trainer Smaǵul Negmatov.
