Elordada aqyly turaqtardy ákimdik qaramaǵyna qaıtarý protsesi qalaı bolady

ASTANA. KAZINFORM – Elorda ákiminiń orynbasary Ersin Ótebaev elordadaǵy aqyly turaqtardy basqarýdy memlekettiń qaraýyna qaıtarýǵa qatysty túsinik berdi.

— «Astana turaq keńistigi» atty jeke seriktes boldy. Qazir olarmen kelisimshartty buzý týraly qujattarǵa qol qoıyldy. Endi (aqyly turaqtardyń) memleketke ótýi rásimderi iske asyrylyp jatyr, — dedi Ersin Ótebaev Parlament Májilisinde tilshiler suraǵyna jaýap bere otyryp.

Onyń aıtýynsha, qazir aqyly turaqtarǵa qatysty múlikti túgendeý jumystary istelip, ony ákimdiktiń qabyldaýy is-sharalary júzege asady.

— Bastapqyda aqyly turaqtarǵa ákimdik eshqandaı qarajat jumsaǵan joq. Turaq aqysy (1 saǵatyna) 100 teńge bolsa, onyń 25 paıyzy memleketke túsetin, al qalǵan 75 paıyzyn zańdy tulǵa alatyn. Aıyppul tolyǵymen memleketke túsedi, — dedi ákimniń orynbasary.

Budan buryn habarlanǵandaı, búgin Májilistiń jalpy otyrysynda depýtat Baqytjan Bazarbek elordadaǵy aqyly turaqty basqarýdy memlekettiń qaraýyna qaıtarýǵa qatysty pikir aıtty.