Elordada AI-kameralar júrgizýshilerdi baqylaýǵa aldy

ASTANA. KAZINFORM – Astanada kameralar júrgizýshiniń telefon qoldanyp, qaýipsizdik beldigin taqpaǵanyn anyqtaıdy. 

Astanada jol qaýipsizdigin arttyrý maqsatynda jasandy ıntellektke negizdelgen júıeler engizilip jatyr. Elordada Astana Smart City jobasy aıasynda jol qozǵalysy erejeleriniń jańa túrdegi buzýshylyqtaryn anyqtaıtyn AI-vıdeosaraptamanyń keńeıtilgen múmkindikteri iske qosylyp jatyr.

Jańa algorıtmder avtomatty túrde kólik júrgizý kezinde telefon qoldaný, qaýipsizdik beldigin taqpaý jáne jol qaýipsizdigine áser etetin basqa da faktorlardy anyqtaı alady. Qazirgi ýaqytta bul buzýshylyqtar testilik rejımde tirkelip jatyr. Júıe kompıýterlik kórý jáne mashınalyq oqytý tehnologııalaryna negizdelip, joǵary dáldik pen jedeldikti qamtamasyz etedi.

Dástúrli júıelerden aıyrmashylyǵy, jańa AI-kameralar tek jekelegen quqyq buzýshylyqtardy tirkeýmen shektelmeı, qalalyq jáne memlekettik aqparattyq júıelermen biriktirilgen biryńǵaı tsıfrlyq platformanyń bir bóligi bolyp sanalady. Bul jol jaǵdaıyn keshendi taldaýǵa jáne kólik aǵyndaryn tıimdi basqarýǵa múmkindik beredi.

Joba aıasynda aqparattyq qaýipsizdik talaptaryn saqtaý máselesine erekshe kóńil bólinip jatyr. Júıe qajetti sertıfıkattaý rásimderinen ótip, kezeń-kezeńimen engizilýde.

Atalǵan sheshimder jol-kólik oqıǵalarynyń sanyn azaıtýǵa, júrgizýshilerdiń tártibin arttyrýǵa jáne qala turǵyndary úshin qaýipsiz ári jaıly orta qalyptastyrýǵa baǵyttalǵan. 

Aıta ketelik Astanada beınebaqylaý kameralarynyń sany bir jylda eki esege artqan edi.