Ár demalys saıyn elorda turǵyndaryn jasyl jelek otyrǵyzýǵa shaqyramyz. Jalpy alǵanda, biz qala ishinde 200 myń, al elordanyń aınalasyndaǵy jasyl beldeý aýmaǵyna 800 myń aǵash otyrǵyzamyz. Qalany kógaldandyrý ekologııalyq jaǵdaıdy jaqsartýda mańyzdy ról atqarady. Olar klımatqa áser etedi, shýdy azaıtady, shańdy ózine sińiredi, bıoártúrlilikti qoldaıdy», – dedi Nur-Sultan qalasy ákiminiń orynbasary Nurlan Soltambekov.

Ákim orynbasarynyń aıtýynsha, jyl sońyna deıin qala aýmaǵyn abattandyrý aıasynda taǵy 22 qoǵamdyq keńistik ashylady. Atap aıtqanda, Prezıdenttik saıabaqta sport jáne balalar alańy, ıt serýendetetin oryn ashý josparlanyp otyr.

Búgingi aktsııa aıasynda 113 ga aýmaqqa sozylǵan Prezıdenttik saıabaqqa qaraǵaı, terek, emen jáne qaıyń kóshetteri otyrǵyzyldy – barlyǵy 200-den astam aǵash. Jaqyn arada 1000-ǵa jýyq aǵash otyrǵyzý josparlanýda.

Memleket basshysy eldi aýqymdy kógaldandyrýdyń, ekologııalyq ahýaldy jaqsartýdyń mańyzdylyǵyn birneshe ret atap ótti. Ol úshin qalada birqatar júıeli shara qabyldandy. Elorda ákimi Altaı Kólginov buǵan deıin málim etkendeı bıylǵy kógaldandyrýdyń ereksheligi aýla aýmaqtary, saıabaqtar, skverler, býlvarlar men turǵyn úı massıvterinen basqa, qalanyń kórikti jerleriniń irgeles aýmaǵyn kógaldandyrý bolmaq.

Mysaly, Q.Qýanyshbaev atyndaǵy Qazaq mýzykalyq-drama teatry men «Astana Balet» aýmaǵynda jasyl baq, Trıatlon-parkte mamyrgúl, al «Astana Opera» janynda emen baǵy ashyldy.